Penalty pettu tur Haaland – Pep

Pathianni zan khan Manchester City chuan 3-1 in Aston Villa an hneh. Villa an hneh tum hian si hnih faia hma an hruai laiin penalty an hmu. Penalty hi Erling Haaland-a’n a pet ngei tura ngaih a nih laiin rin loh takin Riyad Mahrez chuan a pet teh tlat. Manchester City manager Pep Guardiola chuan penalty pet tu tur chu Haaland a la nih reng thu a sawi.
Aston Villa lakah chawlhlawk dawn hnaihah City forward Jack Grealish-a’n penalty a hlawh tum hian Riyad Mahrez leh Rodri ten ball an inchuh a. Gundogan a inrawlh hnuin Mahrez hian penalty a pet a, penalty ven thiam Martinez venah chiang takin a pet goal. Aston Villa lakah goal a thun lova, penalty pettir a nih loh vang leh second half-ah mual chhung a luh tawh bawk si loh vangin Haaland hi a lungni lo hle niin an sawi. Penalty pettu chungchang hi City manager Pep Guardiola chuan a sawichhuak zui thuai a, penalty pettu tur chu Haaland a nih thu a sawi chiang nawn leh.
Guardiola chuna “Mahrez-a’n penalty pet a duh a, Rodri a lo inrawlh khan eng nge an sawi ka hre lova, ka la sawipui thuai ang. Penalty pet duh dang an awm kha thatna lai a awm a. Mah se, penalty pet tura ruat a awm a, chu chu Haaland a la ni reng. Penalty pet tur a awm a nih pawhin ani hian a pet zui zel ang”, tiin Haaland chunga rinna zawng zawng a ngah thu a sawi.
Norway forward Haa-land hian Borrussia Dortmund atanga Man-chester City a zawm hnuah penalty vawi li a pet tawh a, a la pet goal vek. Club leh ram tan penalty a pet tawh zawng zawngah vawi hnih chiah a thelh. Hei hian penalty pet thiam a nihzia a tilang chiang viau. Tottenham lakah goal a thun loh vangin Haaland hian goal thun leh thuai a mamawh a. Villa lakah goal thun theihna hun tha tak a neih Mahrez-a’n a chhuhsak tlat khan mak tih a hlawh a. Mahrez chet dan khan Haaland ngei pawh a ti hrilhhai viau niin tarlan a ni bawk.