Saudi Arabia-ah Fifa cclub World Cup

Ram hausa Suadi Arabia chuan kum 2023 ah football inelna lian a thleng dawn a, tui let hnua a vawikhat nan Fifa club World Cup 2023 an thleng dawn.
Fifa Club World Cup 2022 chu chawlhkar liam ta mai khan Morocco ah khelh zawh a ni a, he inelnaa record nei tha ber Real Madrid chuan Saudi Arabia club Al-Hilal hnehin an champion. Al-Hihal hi champion zo lo mahse Saudi Arabia club zingah Fifa club World Cup final lut thei awmchhun an ni tho thung. Fifa Club World Cup 2023 hi December 12-22 chhungin khelh a ni dawn a. Kum 2000 atanga khelh tan Fifa club World Cup hi ram parukin an thlenna tur chiah a ni.
Fifa club World Cup 2023 hi Australia leh New Zealand ten Fifa hnenah thlen an dil a, Saudi Arabia an nek-chhuak zo ta lo thung. Infiamna hrang hranga sum thawh hnem tak Saudi Arabia hi Gre-ece leh Egypt te nen inkawpin Fifa World Cup 2030 thlen dil an tum niin tarlan a ni bawk. Hei bakah hian Asian Cup 2027 leh Women’s Asian Cup 2026 an thleng dawn bawk.
World Cup 2022 ah khan Saudi Arabia hian Argentina an hneh teh tlat a, an hneh tak Argentina hi an champion zui ta hial bawk. World Cup-ah Argentina an hneh hnuah khawvela footballer tha ber ang hiala ngaih Cristiano Ronaldo chuan Al-Nassr a zawm zui leh bawk nen he ram hausa hian football-ah thawm an nei na sawt hle.
Fifa chuan kum 2025 atangin Fifa club world cup hi tihlen tumin ruahmanna an siam a. Kum li danah inelna neih niin, team 32 an inel tawh dawn a. Team 32 zinga team 12 ngawt hi Europe khawmuala football team an ni dawn nghe nghe.
Fifa Club World Cup ah hian team 11 an champion tawh a. Champion ngun ber chu Real Madrid niin vawi nga an champion tawh a. Bar-celona hi vawi thum an champion tawh a. Corinthians leh Bayern Munich te vawi hnih ve ve an lo champion tawh bawk.