Perek chunga ding rei thei

Perek chunga ding rei thei
Lebanese Ramy Naouss chuan thing pheka perek kilh lawr fur mai, a zum lam rapa ding rei thei ber record a siam a, darkar 12 leh minute 12 leh second 8 a ding thei. Ramy hi cancer vei tawh damleh a ni a, an chhungkaw zinga cancer avanga nunna chan an awm tawh a, he natna dona kawnga mipuiin awareness an neih lehzual theih nan tiin hetiang record hi a siam ta a ni.
Ramy hian pheikhawk a bun lo va, a kephah hnuaiah a vun tih loh chu engmah thil dang a awm lo. Tichua, thingphek-a perek an kilh lawr fur mai chu a ke lawnga rapin, darkar 12 chuang a ding ta ngar ngar mai a ni.
Ramy hi pa tuarchhel tak mai niin, a kehnuaihi a chang ve hrim hrim te pawh a ni mai thei a, Dbayeh Corniche atanga Batroun thleng ke lawngin a kal tawh a, hemi tuma kelawnga a kal thui zawng hi km 42 a ni a, hei pawh hi miin cancer inhriatchhuah hma kawnga awareness an neih theih nana a tih a ni bawk.
Ramy chuan heng a thil tihah hian rilru paukhauh chu a pawimawh ber niin a sawi a,, “Kan rilru lam paukhauhna hian thil theih loh ni a ngaih te pawh min tihtir thei thin a ni. Tum ruhna leh tih tak takna kan neih chuan kan phak bak hi kan lo ti thei khawp mai,” a ti.
Ramy chuan kan thil neih te hi kan hloh phawt hma loh chuan thil nihphung pangngai ve reng emaw kan ti mai thin ni a a hriat thu sawiin, kan taksa hriselna pawh a nih dan tur pangngai emaw kan ti mai a, mahse, eng emaw natna kan neih hnuah chauh chutiang chu a lo ni lo tih kan hre chauh thin ni a a ngaih thu a sawi a, “Thlarauin taksa a chhuahsan chauh hi thihna a ni lo, beiseina hloh hi thihna hmasa a ni tawh,” a ti bawk.
Ramy chuan record dang pawh la siam belh zel a tum thu sawiin, “He record hi ka zinkawng bul tanna chauh a la ni a, Guinness World Record dang tam tak ka la siam belh ang- hei hi khawvel mipuiin ka thusawi an hriat theihna kawng tha tak a ni si a,” a ti.