Phaitual basketball-ah Mizo team-in semi lut zo lo

Tun, January 21-27 chhunga Bengaluru, Karnataka-a khelh zawh tak 72nd Junior National Basketball Championship 2023-ah India hmarchhak aiawha chhuak North East champion Mizoram team chuan Ningani khan quarter-final match pakhatah Uttar Pradesh an hneh lo a, an tum an hlenchhuak zo lo.

He championship final round hi India ram hmun hrang hrang zone-a then intihsiak hnua zone champion theuh leh a titha team thenkhatte khelh mi niin, Mizoram Basketball Association (MBBA) tirha fehchhuak Mizoram team hi North East zone champion an nih angin North East aiawha fehchhuak an ni.

Mizoram hi Group B-ah Tamil Nadu, Uttarakhand leh Delhi-te nen awmhoin, karliamta Inrinni tlai khan an bultanna inkhelah 88-63-in Delhi an hneh nghal a; Pathianniah chesualin Tamil Nadu lakah 71-88-in an tlawm.
Tunkar Thawhtanni khan Uttara-khand lakah insiamthain 88-73 hnehna an chang zet a, Thawhlehnia an hmachhawn Chandigarh chuan 77-75-in an hneh leh a; Nilainiah pawh chak zo lo lehin Rajasthan chuan 85-52-in an sawp leh.

Tournament khelh dan kalphung hi a tirah team 16 chu group paliah thenin, group tina a titha team pahnih theuhin quarter-final stage an chuangkai a; hemi chinah hian quarter-final khel nghal loin a titha team pariatte hi group pahnih (Group E leh F)-ah team pali ve vein an dah leh te te a, group khata awm-te chu an intumkual leh ta a ni.
Ti chuan, Group E lama titha ber leh Group F-a hniam ber intumin, Group E lama titha ber dawttu leh Group F-a hniam ber dawttu chuan quarter-final an khel ta a ni.

Tarlan tawh angin, Mizoram hian last eight stage lama an hmachhawn Uttar Pradesh ngam loin semi-final an thleng zo ta lo a ni.