Phullem phah thar hawng

Pradhan Mantri Jan Vikas Karyakram (PMJVK) atanga Lawngtlai Vengpui YLA Khelmual tihchangtlun leh phullem (synthetic turf) phah chu Nilaini khan Sports & Youth Services minister Robert Romawia Royte chuan a hawng a. MSSC Lai Cup 2023 (Inter-Branch YLA Football & Volleyball Tournament) buatsaih chu a hawng nghal.
Minister chuan Lawngtlai district-in infiamna kawnga hma a sawn theihna’n sawrkarin hmalakna tam tak a kalpui mek a, a hlawhtlinna pawh hmuh zel a ni tih a sawi a. Tun sawrkarah Mizorama sport infrastructure tihchangtlunna’n state budget piahlamah sawrkar laipui leh agency hrang hrang atangin hmasawnna hna thawhna tur sum thahnem tak hmuh a ni leh, chumi kaltlanga hna thawh a ni chu thil lawmawm tak a ni tih a sawi. Phullem phah khelmual thar chuan district chhunga infiammite tan hmasawnna tam zawk a thlen a beisei thu a sawi bawk.
Synthetic turf phah zau zawng hi a dung metre 106 leh a vang metre 70 niin, play area hi a dung metre 100 leh a vang metre 66-a zau a ni. Turf phah hi ACT Global Company USA siam a ni. Security fencing metre 2.20-a sanga hungkual a ni.