Plastic bag hmang lo tura inzirtir Ni hmang

Plastic bag hmang lo tura inzirtir Ni hmang
Urban Development & Poverty Alleviation department leh State Mission Directorate Swachh Bharat 2.0 buatsaihin Thawhtanni khan Aizawlah ‘International Plastic Bag Free Day’ hman a ni a. Hemi rual hian hmankhat daih plastic hmang tawh lo tura inzirtirna beihpui hawn nghal a ni.
He hun hmanpuitu deputy chief minister Tawnluia chuan mihringten ni tina bawlhhlawh an tihchhuah senghawi, a paihna hmun bika paih, sawngbawl, hman nawn theih leh leithaa siam theih thliarfel chu Pollution Control Board nen thawkdunin, nasa taka hma an lak tawh thu a sawi a. District tinah Solid Waste Management Center din tum a nih thu sawiin AMRUT 2.0 hnuaiah faina kawnga hmasawnna thlen tum a ni tih a sawi. Hman khat daih sarang titawp turin kum 2021 atangin sawrkarin hma a lak tawh thu a sawi bawk.
Hman khat daih sarang titawp turin sawrkarin mipui thawhpuina a mamawh takzet tih Tawnluia hian sawiin, “Bawlhhlawh a bawma paih leh thianghlimna chungchang inzirtirna hi chhungkuaa bul tan a pawimawh a; thalai lungfing leh zuanzang zawkten faina leh hmankhat daih sarang tihtawp kawngah nu leh pate kan kaihhruai a tul a ni,” a ti. Helam kawnga sawrkar hmalaknaten rah tha a chhuah zel chu lawmawm a tih thu sawiin, mi tin tanrualna tel lo chuan heng beihpui hi a hlawhtling thei lo tih hrereng turin a chah a ni.
Chief secretary Dr Renu Sharma bakah MPCB member secretary C Lalduhawma chuan India rama hmankhat daih sarang titawp tura hmalaknate sawiin, sarang tawih thei lo te hian khawvel a tihbuai avangin titawp tura thapui thawh a ngai takzet tih a sawi.
Inkhawmah hian ‘Cleanliness Trekking Expedition’ neia Lailapur atanga Khaikhy (Siaha district) thleng kea km. 623 a thui kal Vanlallawmzuala Varte chawimawi a ni a. Swachh Bharat Mission (U) 2.0 Ngopa local ambassador H Zoramhruaia’n hun a hmang bawk.
Aizawlah bakah hian district thenkhatah sawrkar thuneitute leh department hrang hrang huaihawtin he Ni hi hman a ni.