Point 5 a sang fal Arsenal

December 5, Thawhleh zan khan English Premier League khelh chhunzawm a ni a, hmahruaitu Arsenal chuan harsa takin Luton Town an hneh. Declan Rice goal thun hmanga hnehna chang Gunners hian point ngain hma an hruai fal a, champion tumin hma lam an pan zel.
Gunners chakpuitu Rice
West Ham leh England midfielder Declan Rice hi nipui bazar inhawn lai khan Arsenal chuan manto takin an la lut a, an tisual lo. Treble champion Manchester City aia a thlan zawk Arsenal tan Rice a khel tha chho viau a, thawh tan zan khan Luton Town lakah chakpuiin, point ngain hma an hruai fal theih phah. Rice rual hian Arsenal player thar Kai Havertz a khel tha chhunzawm a, Luton lakah hian goal a thun ve bawk.
Kenilworth Road a lenglut Arsenal hian bul an tan tha a, goal pawh an thun har lo. Brazil forward abriel Martinelli chuan Bukayo Saka siamsak tha tak chu goal kil lei hrulah fuh zetin a pet goal a, minute 20-naah hmahruaina goal a thun.
Hma takah goal an thun vangin Mikel Arteta team Arsenal phur viau mah se an phur rei lo. Goal an chhuah hnuin mualneitu Luton Town in goal thun tumin an mikhualte an nawr a, an hlawhtling thuai. Minute 25-naah Doughty corner pet tha tak chu Gabriel Osho chuan Arsenal si nghak David Raya dan rual lohin a tauh goal a, an si phurh a sut.
Goal khat ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Chawlhlawk dawn hnaih minute 45-naah Gabriel Jesus chuan defender Ben White ball siam tha tak chu tibuaitu awm lovin, hnaite atangin a tauh goal a, hma an hruai nawn lehna goal a thun a, 2-1 a hmahruai chungin chawlhlawk an hmang. Arsenal forward Jesus hian goal khat a thun bakah assist a nei zui leh a, goal thun pup pup lo mah se Gunners tan a pawi-mawhzia khawvel hriatah a pho lang nawn leh.
Hnufual zawk ni chunga second half bul tan Luton Town in second half-ah bul an tan tha a, goal an thun thuai. Second half tan atanga minute lina lekah Doughty ball vawrh tha tak chu Elijah Adebayo chuan harsatna tawk lovin a tauh goal a, an si phurh a sut. He goal luh danah hian Doughty ball vawrh thain, Elijah Adebayo hian tauh tha thawkhat mah se Arsenal si nghak David Raya a chetha tawk lova, dan theih ngei tura ngaih a dang lo niin a lang. Luton Town lakah a chetsual leh tak vangin Aaron Ramsdale nekchhuaktu David Raya lakah zawhna a tam leh zual a, amah ring tlattu Mikel Arteta lakah zawhna a tam sawt viau bawk.
Goal a chhuah hnu lawkah David Raya a che fuh lo nawn leh. Minute 57-naah angle chep tak kar atanga Ross Barkley pet chu Spanish tan dan theih ngei tura ngaih ni bawk mah se a dang lo nawn leh a, mualneitu Luton Town in 3-2 in hma an hruai let ta daih a, Arsenal tantute an hlauthawng hman hle.
Hunfual zawka an tan hnuin Arsenal in chak tum in tan an khawh zui a, an khel a hmuhnawm sawt hle. Ball chang tam zawka tang reng Gunners hian fuh zetin an nawr tlang ta nge nge. Fuh zeta an nawr tlang hnuin tunlaia chetha chho tak Kai Havertz chuan Gabriel Jesus siamsak tha zet chu minute 60-naah awlsam takin a pet goal a, an si phurh a sut.
Goal ruk ngawt a luh hnuin team hnihten chak ngei tumin tan an khawh zui a, inkhel hmuhnawm an lantir. Ball chang tam zawk Arsenalin goal thun tumin an khingpuite an nawr a, hun tha nei zauh thin mahse goal an thun belh thei mai lo. 17-naa awm mek Luton Town hian hmahruaitu lakah point hlawhchhuah ngei tumin an goal an veng a, goal chhuah belh loh hram tumin tan an khawh nasa viau thung. Hun pangngai tawp thlenga goal lut a awm belh theih loh vangin Arsenal an chak zo dawn lo niin a lang hman a. Arsenal tantute an ngui a, Manchester City leh Liverpool tantute an phur hman viau thung.
Table mawngphah lama awm Luton Town lakah an chak zo dawn lovin lang hman mah se Arsenal an beidawng duh lova, hun rat thlengin chak tumin thapui an thawh. An huaisenna leh an thawhrim rah an seng a, Gunners hian hun tawp dawn hnaihah goal an thun belh ta nge nge. Hun pek belh minute 90+7-ah midfielder hmuhnawm Declan Rice chuan captain Martin Ødegaard siam tha tak chu fuh zetin a tauh goal a, an chakna goal a thun. Rice goal luh hnu hian goal dang a luh belh thei tawh lova, goal sarih zet luhna inkhelah Arsenal chuan 4-3 in hnehna an chang zui ta a ni.
Luton Town lakah harsa taka hnehna chang Arsenal hian khelh 15 atanga point 36 hmuin an hmahruaina an tizau a. An hnuai chiaha awm Liverpool nen an inkarah point nga a tla zep mek a, champion lai Manchester City aiin point rukin an sang zawk mek bawk. Gunners hian Liverpool leh City aiin vawi khatin an khel tam zawk thung. Arsenal laka tlawm Luton hi 17-naah an awm chhunzawm.