Post Malone & Morgan Wallen ‘I Had Some Help’ a No.1 leh ta

Post Malone ‘I Had Some Help’ featuring Morgan Wallen chu Billboard Hot 100 chart-ah No.2 atangin No.1 a kai thar leh ta a, he chart-ah hian a zawn ni lovin kar ruk a No.1 tling ta. Post Malone hian e chart-a No.1 kai thei hla paruk nei tawhin, Morgan Wallen hian No.1 kai thei hla pahnih a nei ve tawh thung.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), sales data leh radio airplay te chu tehna pawimawh a ni.
‘I Had Some Help’ hian kar khat chhungin radio airplay-ah ngaithlatu maktaduai 76.5 a la nei thei a, stream maktaduai 39.1 leh sales 12,000 a tling bawk a, hei hi chart-ah a No.1 pui leh ta a ni.
He hla hi kar nga a No.1 hnuah No.2-ah a tawlh a, tunah No.2 atangin No.1 a kai leh ta a, he chart-ah hian kar ruk a No.1 tling ta a, kumina he chart-a kar ruk No.1 thei hmasa ber a ni.
Shaboozey ‘A Bar Song (Tipsy)’ chu No.3 atangin No.2 a kai tar a, chart No.1 hlui Kendrick Lamar ‘Not Like Us’ chu No.6 atangin No.3-ah a insawn thar leh a, Sabrina Carpenter ‘Espresso’ chu No.4-ah bawk a la awm a, Sabrina hla dang ‘Please Please Please’ chu kar khat chart-a a No.1 hnuah No.5-ah a tawlh ve thung.
Tommy Richman ‘Million Dollar Baby’ chu No.5 atangin No.6-ah a tawlh a, chart No.1 hlui Hozier ‘Too Sweet’ chu No.7-ah bawk la awmin, Benson Boone ‘Beautiful Things’ chu No.8-ah bawk la awmin, chart No.1 hlui Teddy Swims ‘Lose Control’ chu No.9-ah bawk la awmin, Billie Eilish ‘Birds of a Feather’ chu No.10-ah bawk a la awm.