Primary sikul kai rual hmeichhia mtd 15-in sikul kai lo

Primary sikul kai rual hmeichhia mtd 15-in sikul kai lo
Khawvel pumah hmeichhe naupang primary sikul kai rual maktaduai 15-in sikul an kai lo mek niin UN Women-in a sawi.
Nilainia report an tihchhuah tharah naupang sikul kaitirah hian hmeichhia leh mipa enhranna a la nasa hle a, inang tlanga sikul kaitir chu a la hla hle niin an tar lang tel.
Report-ah hian tun hnai kum eng emaw ti liam ta atangin hmasawnna a awm hret hret a, primary leh secondary sikula inziak lutah hmeichhia leh mipa an intluk tawk hret chungin hmun thenkhatah erawh chuan hmeichhe naupang sikul kai lo hi 48.1% zette pawh an la awm tih tar lan a ni.
Primary school kai rual zingah hmeichhe naupang maktaduai 15-in an kai loh laiin mipa naupang erawh maktaduai 10 chauh an ni thung.
Report-ah hian hmasawnna pawh tar lan niin tun hma lam ai chuan hmeichhe naupang zinga sikul kai an tam zawk a. Kum tin primary sikula hmeichhe inziak lut hi an pung tih a lang a, hei hian hma taka pasal neih leh hna thawh a titlem hle a; hei bakah hian a tihrisel a, an nunkhua a nawm phah tih tar lan a ni bawk.
Hetih lai hian tleirawl zingah zirna chhunzawm harsatna erawh a la awm reng a, tam tak chu hma taka nau an pai avang leh in lama chhawr atanga chhungkuain an mamawh avangin secondary sikul an lut zui thei lo.
“Tun hma aiin hmeichhe naupang sikul kai an tam tawh zawk a. Sikulah hian ziak leh chhiar chauh an zir lo va, kum tin primary sikul an chhuah hnua kum naupang taka pasal nei zat a hniam phah tel a. Hna an neih theih phah a, an hriselna pawh that phahin an nun a nawm phah a. Hmeichhe naupang leh hmeichhiate hian lehkha zir tura dikna chanvo pangngai tho an nei a, an dam chhunga zir theihna an nei a ni,” tiin report-ah hia tar lan a ni.
“Hmasawnna duhawm tak a awm mek lai hian hmun thenkhatah chuan hmeichhe naupang 48.1% zet sikul lut lo an la awm a. Primary leh secondary sikula hmeichhe leh mipa inziak lut zat pawh a inhnaih tawh hle,” tia tar lan a ni bawk.
UN chuan report chhuak hi X-ah tar langin, “Zirna hi mihringte dikna chanvo a ni a. Ram tam takah hmeichhe naupang leh hmeichhiate hian thliarna an la tawng a, sikul luhna kawngah pawh en hran an la ni,” an ti.
UN Women-in report an tihchhuah hi Afghanistan-a Taliban-in ro an rel thar leh kum lina thlen dawn lai a ni a. Kum 2021-a US leh tangrual sipaiten an chhuahsan rualin Kabul-ah thuneihna an chang zui lehnghal a ni.
UN Women chuan Afghan hmeichhia 78%-in lehkha an zir lo va, hna emaw, training emaw an nei lo va, mipa thalaite let li dawnin an tam tih an sawi.
Afghanistan-a hmeichhe naupang zinga secondary sikul kai lo awm tam lutuk hian kum tin an ram sum thawh chhuah 2.5% an hloh phah niin an tar lang bawk.