Pro Volleyball: TNT chauhin state pawn player chhawr dawn lo
Pro Volleyball: TNT chauhin state pawn player chhawr dawn lo
Thutak Nunpuitu Team chuan a vawihnihna’n Mizo hlanga champion tumin fiahna an hmachhawn dawn a, mipa team ruk zinga state pawn player chawlut lo awmchhun Muanna veng team hi EverHome Pro Volleyball League inkhel hmasa berah Tuichangral nen an innuai dawn.
LPS Arena, Falkland-ah April ni 29, Thawhlehni zan dar 8-ah tan a ni dawn a, mipa team parukin trophy an inchuh ang.
TNT tih loh team dang panga – Tuichangral, Khawbel, Sihphir, Anastasia Electric Veng leh Huntharin squad tichak turin state pawn atangin player an lalut vek a, Pro Volleyball-a tawnhriat nei tawhte leh vawikhat inlanna tur an awm bawk.
THUTAK NUNPUITU TEAM
Club hruaitu Vanlalmuanpuia chuan Mizo hlanga an champion kum 2023 ang mai khan an player-te an inpeih niin a sawi. Season kal mekah Pro Division inelna vawihnih buatsaih tawh a ni a, TNT hian hma an sawn hle tih khelmualah an lantir.
Nikum October thla khan an hmunpui Muanna Veng-ah 2024-25 season tanna Invitation Cup an thleng a, semi-final-ah tlain Tuichangralin 3-0-in an hneh; mahse, thla liamta khan Lungleiah MVA Cup an inchuh a, inkhel zawng zawngah TNT chak fai vekin an champion a, an elpui lian Tuichangral nen tum hnih intawngin 3-1 ve vein an chak.
Kum hnih kalta kha TNT vanglai a ni a, Vanlaltanchhana, Zosangzuala (Lalmama), K. Zodingliana, captain Vanlalchhantluanga Sailo, Laldinchhunga leh setter Lalliankimate’n rahbi thar tukin Pro Volleyball chanchina Mizo hlanga champion thei awmchhun an ni.
Season liamtaah an tlahniam viau a, Mizoram inelna sang berah final an lut pha lo. Tun season-ah Tuichangral atangin spiker Saidingpuia Sailo lalutin, Northeast Khawdungsei rawlthar Lalsaitluanga chu rinrawl atan an hmang chho bawk.
Tlangsam player pahnih Dinchhunga leh Liankima an chhawr mumal thei lo a, Pro Volleyball squad-ah pawh an tel lo, mahse, MVA Cup-ah setter atan F. Lalhriatpuia an hmang a, a rintlak tih a chiang tawh a, coach Lalhmangaihsaga Sailo chuan ‘Mizo hlanga champion leh tumin theihtawp an chhuah dawn’ tih a sawi.
TNT tan a vuak lamah Valbuanga’n a thawhhlawkin an innghahna pawimawh a ni a, chutih rualin a vuak lamah team tha leh hriam ber an ni hran lo. Net bula lehlam hlap dan kawngah erawh fak an hlawh a, 2024 best blocker Lalmama bakah Zodinga an nei. Team boruak tha leh lehlam hlap an lak theih avangin an dingchang fo a, an chakna thuruk pawimawh tak a ni.
Kum 2016-ah Pro Volleyball buatsaih tan a ni a, tun hi a vawiriatna niin, mipa team zinga la tel kim vek pahnih zingah TNT an tel a; kum 2016-ah final lutin Anastasia an hneh lo a, kum 2023 final-ah Hunthar an hneh ve thung.
TNT Squad
Lalpekmawia, Saidingpuia Sailo, Lalsaitluanga, Malsawmtluanga, Sadrak Fanai, K. Zodingliana, Lalrammawia, Zosangzuala, Vanlaltanchhana, F. Lalhriatpuia, Vanlalchhantluanga Sailo, Ramdinpuia
Coach: Lalhmangaihsanga Sailo
Assistant Coach: Vanramliana,
Lalhmangaihzuala
TUICHANGRAL
A vawikhatna’na Pro Volleyball champion nih tumin Tuichangralin chona thar an hmachhawn dawn a, coach David Aizampuia Fanai chuan insiamthatna tur an neihte siamtha turin an inbuatsaih tih a sawi a, an tan hun tha a inherchhuah tawh a beisei.
Pro Division season kal mekah Tuichangralin title chuh phak team an neih mai bakah an player neihte atangin rin an hlawh a; 2024 Pro Volleyball best spiker Zomuansanga bakah Johan Vanneihsanga leh tawn hriat nei tha Lalbiakmuana an kawl a, setter C. Zonunmawia, Vanlaltanpuia leh R. Vanlalmawiate an kawl bawk.
Tun season-ah bul an tan tha a, Invitation Cup champion an ni nghal, mahse, hma an sawn lo a, thla liamta khan MVA Cup-ah TNT an ngam lo viau a, hei hian an lakah rinhlelhna lian tak a awm phah.
Team tichak turin an squad-ah state pawn player pali an ziaklut a, he’ng zingah hian nikum Pro Volleyball-a an hman tawh Sonu a tel.
Kum 2018 atangin Mizoram inelna sang berah Tuichangral an tel a, final lut nghalin Hunthar an hneh zo lo. Nikumah a tum hnihna’n final an lut a, Hunthar bawk hneh loin pahnihna an ni leh a ni.
Tuichangral hian Mizo player tha leh thiamna chi hrang hranga ball hlap tla thei an kawl nual a, mahse, net bula lehlam vuak dang thei tur an nei tha tawk lo mai thei?
Pro Volleyball an khelh tawhah beisei ang takin an khel chhuak zo lo fo a, hun pawimawhah an tlo tawk lo thin. Team nungchang puitling tawk lo avangin vuak sual leh ho deuha point hloh an neih phah niin a hriat bawk.
Tuichangral squad
Lalbiakmuana, Zomuansanga, C. Zonunmawia, H. Lalramdinmawia, Johan Vanneihsanga, Vanlaltanpuia, R. Vanlalmawia, Jony Lalremruata, PC Lalthazuala, Rochamliana Sailo, Laltlanmawia, Lalrinngheta, Max Lalhruaitluanga, Lawmsangzuala, Chirag Yadav, Sonu, Rajneesh Singh, Tanish Choudhary
Coach: David Aizawmpuia Fanai
Assistant Coach: PC Vanlalhruaia,
Malsawmsanga
KHAWBEL
A vawikhatna’n Pro Volleyball-ah Khawbel an tel dawn a, coach Vanlalmawia chuan ‘Mizo player an neihte tan inelna a hautak dawn a, state pawn atanga player awmze nei tham pakhat an neih belh chuan champion tumin an khel thei ang’ tih a sawi.
Mawia hi kum zawn, 2017 leh 2018-a Hunthar champion-puitu a ni a; ball vuak lamah team hriam ber an ni dawn lo tih a hrechiang a, mahse, team inpumkhatna leh thawhhona tha nei turin an inpuahchah a, Mizo player langsar kawl lo chungin a player-te chungah rinna a nghat.
Khawbel hian state dang atangin Ashwal Rai an lalut a; feet 6 leh inchi 7-a sang niin, net bula lehlam vuak dan kawngah India rama hriat hlawh leh dahsan a ni phak.
India aiawhin Asian Championship leh World Cup a khel tawh a, Prime Volleyball League-ah Kolkata Thunderbolt player ni lai a ni bawk.
Tun season Pro Division inelnaah Khawbelin TNT leh Tuichangral an el phak lo deuh a; chutih lain Mizo player tawnhriat nei tha Lalruatfela Sailo leh setter David Lalramhmachhuana an kawl a; Zonunsanga, Lalhruaizela, Rodingliana leh player dangte’n Ashwal an thawhpui thiam a nih chuan team hlauhawm tak an ni thei dawn.
Khawbel squad
Lalhruaizela, Rodingliana, Clement Lalruatzela, Francis Lalhmingliana, Joseph Lalbiaksanga, Clement Lalhmingliana, Innocent Malsawmzuala, Lalhunthara, Lalchhanhima, Zonunsanga, Joseph Zoramhmangaiha, H. Malsawmsanga, Paulunlal, Jimmy Zothantluanga, Lalruatfela Sailo, R. Lalmalsawma, David Lalramhmachhuana, Lianhlusang Vaiphei, Ashwal Rai
Coach: Vanlalmawia
Assistant Coach: K. Ramtharlawma,
Richard Laltanpuia
(…Chhunzawm tur)