Nilaini zan French League 1 inkhel pakhatah chak harsat rei fu Paris Saint Germain chuan 3-1-in mualneitu Mont-pellier an hneh a, an lawmna tikimlotu awmchhun chu first half tir lama hliam avanga Kylian Mbappe khelmual chhuahsan kha a ni ngei ang.
-- Advertisement --
First half-a mikhual team-in goal an thun theihlohna inkhelah France striker hian tan atanga minute 10-na lekah goal hmahruai thun theihna hun remchang hmu bawk mah se a penalty chhuih chu Montpellier keeper-in a dansak a, chhuihnawn lehin, goal ban a petper a, chumi lo letleh atang chuan hun tha dang hmu leh bawk mah se goal kham chungah a thlawhchhuak luah!
A vanduaina belhchhah turin minute 21 a khel tling hlawt tihah kaihza tha na avangin khelmual a chhuahsan a, Champions League last-16 first-leg lama Bayern Munich hmachhawn mai tawh tur an nih avangin PSG tan an star striker inhliam hi engtia pawi nge a nih dawn sawilawk mai theih a ni rih lo.
PSG coach Christophe Galtier chuan a player hliam chu tihrawl lam harsatna a nih thu sawi chungin a dinhmun endik a nih hma chuan chiang taka sawi theih a neih rih loh thu leh hlauhthawnna lian tak a neih loh thu a sawi a, fixture indawt zut an neih avanga player damchiang lo risk a rem loh thu sawi chungin Mbappe hliam chu serious lutuka a lan loh thu a tarlang nawn leh.
Second half tan phatah Achraf Hakimi chuan Paris club hmahruaina goal thun bawk mah se hnawlsak a ni a; minute 55-ah Fabian Ruiz chuan hnai set sawt atangin PSG hmahruaina goal a thun ta nge nge a, he goal hi Ekitike siamsak a ni.
Goal hmahruai thuntu Ruiz hian minute 72-ah Lionel Messi tan siamsak ve lehin, mikhual team hi sihnih faia chak thei mai tura ngaih an nih hnu minute 89-ah Nordin chuan Montpellier siphurh pakhat zawk a sut then a; hun pekbelh minute hnihna a kal mek laiin Warren Zaire-Emery chuan mikhual goal phai a chhungkhat ve leh.
He hnehna nen PSG hian Ligue 1 table-a anmahni hnaihbertu Marseille lakah point ngain hma an hruai fal.