Rahul piancham pualin tanpuina

All India Professional Congress chuan North East Region states co-ordinator Dr Henry Zodinliana Pachuau hoin Nilaini khan Rahul Gandhi piancham lawmna atan Gilead Special School leh Gan Sabra ah tanpuina sumfai Rs 26000 ve ve an hlan.
Indian National Congress-in Congress hruaitu Rahul Gandhi piancham lawmna atan charity programe hmang tura a tih angin MPCC-a an hotuten AIPC chu hma la turin an ngen a, an theih ang angin hma an la ta tih Dr. Henry Zodinliana Pachuau hian a sawi a. All India Professional Congress chu Congress party peng khat ni mah se, politics tak takah an tel vak loa, an party-in thiamna a mamawhnaah leh a tul angah an pui mai thin tih a sawi.
Gilead Special School enkawltu Mizoram Spastic Society secretary Nuntluangi chuan political party atangin hetiang tanpuina hi an dawng ngai loa, Congress party-in tanpuina an hlan chu an lawm hle tih a sawi. Chief minister hlui Pu Lal Thanhawla chu tuna an school hmun petu, an pawlah pawh tel reng thin a nih bakah tuna Congress president Pu Lal Thanzara chu an pawl hotu thin, an sdviser a ni mek, an school sakna tur fund pawh minister a nih laiin NEC atanga hmuhsaktu a ni tih a lo sawi a ni.