Ram dinhmun ngaihtuah chiang turin MLA-in zirlaite a chah

Ram dinhmun hrechiang a, eng kawng nge a zawh tih ngaihtuah turin MLA Lalrindika Ralte chuan zirlaite a chah.
Aizawl City College Joint Students’ Union (ACCJSU) chuan Inrinni khan Aizawlah Assembly an hmang a. He hun hmanpuitu MLA Lalrindika Ralte chuan thalaite chu ram leh hnam hmalam hun neitu, a siamthatu tur pawh anmahni an ni, tiin, “Kan ram dinhmun hi in hrechiang tur a ni a, eng dinhmunah nge a din a, eng kawng nge a zawh, tih ngun takin in ngaihtuah tur a ni. In hmalam hun chu tihchhiatin a awm em, tihte ngun takin in ngaihtuah tur a ni a, a venhim hna thawktu tur pawh nangmahni in ni,” a ti.

Zirlaite chu tute emaw hmanruaa tang mai mai lo tura fuihin, an theihna leh chakna chu mimal emaw pawl emaw political party-ten hmanruaa an hman phal lo turin a chah. “Tuten emaw an duh an tih tir a, an duh loh an tih tir loh mai mai theihin in awm tur a ni lo. Chutianga bungrua anga hman tumtu che u an awm a nih chuan, chu’ng mite chu in hmelma an ni a, ram leh hnam hmelma an ni bawk,” a ti.

Chapona chu hmasawnna daltu a ni tih Lalrindika Ralte hian sawiin, “Tuna i dinhmun kha i chapopui a nih chuan i dinhmunah i lungawi tawk tihna a ni. He khawvelah hian chapopui tlak khawpa dinhmun tha leh ropui a awm ka hre lo,” a ti. Duhamna kan mualphopui a, kan nunin a chauh phah a, mi tam takin kan chhiatpui mek tih sawi bawkin, “Duham loin, chantawkah lungawi ila, hmasawn turin inbuatsaih ang u. Engtik ni ah emaw chuan kan ram hi dinhmun thazawkah ala ding dawn a. Chumi huna chanvo tha in chan theihna’n kan ram leh hnam tan in theihna sang ber hlan turin in inbuatsaih tur a ni,” tiin zirlaite a chah.

ACCJSU Assembly-ah hian Aizawl khawpui chhunga college 10-a Students’ Union hruaitute an tel a ni.