Ram kang vangin France leh Spain-ah mi 3,00,000 insaseng tawh
France chhimthlang lama thli chak takin a pui ram kang chuan Bordeaux khawpui a hnaih zel karah a thelhtuten theihtawp an chhuah mek a, thuneitu pakhat chuan ‘thunun chu kan la hlat hle’ tih a sawi.
France leh Spain chu ni eng emaw ram kangin tibuai tawhin mi 3,00,000 vel insaseng ngaiin an awm a, thli leh khaw lum takin thelh a tihautak zual.
Emergency puan mekna, Spain-ah chuan khaw awm dan inthlak hretin Madrid daia kang thelhtute a pui.
Spanish Prime Minister Pedro Sánchez-a chuan an ‘hma lamah hun khirh tak’ a awm dawn tih a sawi a. Hetih lai hian València-a thuneitute chuan mipa pakhat thi a awm tih an sawi.
Kum 70 chho vel niin kang thelhtuten Manises-a Salt de l’Aigua kawr ruama kang an thelhnaah a car chhungah thiin an hmu tih tual chhung chanchinbuten an tar lang.
France-ah chuan Inrinni zan thleng khan mi 55,000 insaseng tura tih an ni leh a, chhimthlang lama Gironde leh Landes biala cheng mi 2,50,000 vel insaseng tura tih an ni ta.
Firefighter Captain Nicolas Braz-a chuan AFP news agency chuan kang hian ‘amahin thli a insiam a, a vir vut vut’ niin a sawi a. ‘A rapthlakin thunun theih loh’ niin a sawi a. Zan hun khirh tak an hmabak tih a sawi bawk.
France-ah hian kang thelhtute pui turin sipai tirh an ni a, thing buk leh kang siam thei thilte senghawi hna thawhtir an ni.
President Emmanuel Macron-a chuan France chu ‘tun din’ a ni dawn a, a sorkar chuan ‘a tul thlengin hma a la zel dawn’ tih a sawi.
Bordeaux khawpuiah chuan thliin meikhu a chhem lut nasa hle a, mi chengte pawhin a rimchhe hle tih an sawi.
A bul lawk, Saint-Aubin-de-Médoc-a chengte pawh sawn chhuah ngaiin an awm a, mi cheng pakhat chuan ‘chhiatna’ tiin a sawi.
Pathiannia Tour de France tawpna pawh km 133 tlan tur avangin km 89-ah tihtawi phah niin venhim hna thawktute chu ram kang hnaihna laiah duty ngawrh zualtir an ni tih a huaihawttu leh police-in an sawi.
Macron-a chuan a minister-te nen thutkhawm hmanhmawh kovin hmun 30 vela ram kang nasa tak an tawrh mek an sawiho va, rinphak bak a thleng tih an sawi.
Spain-ah pawh Madrid bulah a la kang chhunzawm zel a. “Nimin aiin vawiin hian kan hma hun a khirh zawk,” tiin Interior Minister Fernando Grande-Marlaska chuan thuthar lakhawmtute a hrilh a. “Khaw awm dan hian min pui lo hle a ni,” a ti.
Thliin ram kang chu chhim lam hawiin a timan kai thei mai thei niin a sawi.
Spain-ah hian ram kang a chhuah tih atangin Madrid leh Ávila region-ah mi 60,000 chuang insaseng tawhin mi 28,000 chuang chhuak thei lovin an inah an awm mek tih interior ministry chuan a sawi.
Inrinni zan tlai tawh takah khan Toledo bula municipality pariatah insaseng tura tihna puan a ni bawk a, mi eng nge ngai dawn hriat a la ni rih lo.
Madrid-a Regional President Isabel Díaz Ayuso chuan ‘an region chanchina ram kang nasa ber’ tiin a sawi.
Sánchez chuan kuminah hian Spain-ah hectare 1,30,000 chuang a kang tawh a, kum 10 chuang kal ta chhung khan tum tin hectare 1,00,000 kang thin ang niin a khum tawh.
French Interior Minister Laurent Nuñez chuan kuminah hectare 98,000 chuang a kang tawh tih a sawi.
Italy-ah pawh ram kang 350 chuang awmin heng zinga 10 hi a nasa niin Sicily thliarkara mi vek an ni tih a sawi.
Zirtawpni zan khan Scotland-ah pawh Cairngorms National Park-a ni 10 kang tawh thelh hna thawh mek a ni.
EU-a commissioner for crisis management Hadja Lahbib-i chuan kumina ram kang hian Europe-a a kan tam ber kum a khum dawn tih a sawi.
France chuan civil protection emergency puangin water bomber an dawng dawn a, Croatia atangin Canadairs pakhat, Portugal atangin Air Tractors pahnih, Czech Republic leh Slovakia atangin Black Hawk helicopter bakah Romanian forest fire team member 40 awmna an kal dawn.
EU Commission President Ursula von der Leyen pawhin EU-a firefighting fleet atangin France leh Spain hnenah thlawhna leh helicopter 11 thawn an ni dawn tih a sawi.