Red wine-in cholesterol tikiang thei

Red wine-in cholesterol tikiang thei
Sa ti sen (red meat) i ei thin avanga i taksaa cholesterol lo inchhek khawl tam chu red wine in-in a tikiang leh thei niin scientist ten an sawi.
Red meat-a compound hlauhawm awm te chuan thisenzamah cholesterol tha lo chhekkhawmin, chu chuan thisenzam a tichhia a, heart attack risk te a tisang thei.
Hebrew University of Jerusalem hnuaia Institute of Drug Research-a professor Ron Kohen leh a thawhpui ten zirchianna neiin, red wine-a antioxidant awm polyphenols chuan red meat-a compound hlauhawm te thisenzama an inchhekkhawl tur chu a veng thei niin an sawi.
Prof. Ron chuan, “Sa-ah hian polyunsaturated fat leh cholesterol a tam hle a, chuvangin sa ti sen chi ei nasa te chuan lung lam (cardiovascular) natna neih theihna risk an nei sang a. Ei leh ina polyphenol tamna chi kan telh hian chu risk chu a tihniam leh thei a ni,” a ti.
Zirchianna neitu te chuan volunteer hrisel tha pangngai te chu chaw chi hrang hrangin an chawm a. Ni li chhung sati sen lam chi an ei tam tir hnuah chung zingah tlem zawk chu ni li dang an ei leh in pangngai tho ei tir lehin, nitin red wine no khat zel an pe tel ta thung a.
Chumi hnuah an taksa an enfiah leh hnuah sa ei tam te chu an thisenzamah compound chikhat malondialdehyde a lo pung a, an cholesterol level a sang zawk bawk. Ni li chhung chaw pui bera sa an rin hnuah chuan an taksaah modified cholesterol chu 97%-in a lo sang tawh a. Heng modified cholesterol hi thisenzam tikhawng a, lung lam natna thlentu niin an sawi.
Mahse, ni li dang chaw pui bera sati sen chi an rin leh a, red wine an in tel tak hnuah chuan an taksaa modified cholesterol chu a pun belh tawh lo mai ni lovin thenkhatah chuan a tlahniam ta niin an sawi.
He zirchianna hi Journal of Functional Foods-ah tarlan a ni.