Road Safety: Passenger pawimawhna
Road Safety: Passenger pawimawhna
Road Safety Month chu February thla chhunga hman turin kar kalta Inrinni February ni 1 khan hawn a ni a, thupui atan “Fimkhur leh him takin lirthei khalh thin ang che” tih hman a ni.
Road Safety thupui hian a fun kim angreng hle a. ‘Fimkhur takin’ tih hian fimkhur ngaihna zawng zawng a huam vek a, mahse kan fimkhur zo tawk thin lova, chetsualna a lo thleng thin chu a ni ber mai.
Sawrkar lamin lirthei chetsual dan record a neihah chuan, lirthei accident 75% hi driver fimkhur loh vang niin tarlan a ni a, a bak 25% chu – rui chunga lirthei khalh, wrong side driving leh mobilephone hman vang, tih a ni. A nihna takah chuan 25% te pawh hi fimkhur loh vang chu a ni ber awm e.
Passenger phur chi lirthei a chetsual hian, a khalhtu ‘driver’ hian mawh a phur sang ber a, a dawtah chuan lirthei neitu a ni ang a, mipui pawhin mawhphurhna chin an nei bawk.
Rui chunga lirthei khalh te hi dan kalh a ni a, mahse kum nga (2019-2023) chhunga Mizorama lirtheia chetsual chhan hrang hrang tarlan zingah rui chunga lirthei khalh vanga chetsualna vawi 85 a thleng a, mi 69 an thi a. Chawhrualin thla tin chetsualna vawi 1.4 a thleng a, thla tin mi 1.1 thi ziah ang a ni.
‘Rui chunga lirthei khalh’ hi, driver thiamlohna lian ber mah se, lirthei neituin driver dinhmun (fitness) a ngaihthah avangin rui chungin driver-in lirthei a khalh a, lirthei neitu mawhphurhna a tel ve. A dawt lehah chuan, passenger-ten driver dinhmun (zu rim a nam leh nam loh te, a ruih leh ruih loh te) an chik lo emaw, an chik a, driver a rui or zu rim a nam tih hre reng chungin thuneitute hnenah report lovin, hlau rilru chung chungin lirtheiah an chuang tho. Passenger-te hian an chuanna tur lirthei driver chu dan kalha zu rim a nam/zu a rui a nih chuan report hmak hmak se, driver-te pawh an insiam tha ngei ang.
Kawngpui chhiat vanga lirthei chetsualna tam tak a awm bawk a, chuvangin road safety-ah hian driver ngawr ngawr ni lo, lirthei tlanna kawngpui sialtu sawrkar hnuaia a kaihhnawih department te pawh hian ‘fimkhur takin kawngpui siam ve bawk se’ tih hi road safety month thuchah atan kan hman a pawimawh tel awm e.