RSa’n lengzem hla chawlhsan a tum em ni?

Tunlai mizo mipa zaithiam huhang nei lian ber J Lalrosanga chuan lengzem hla sak chawlhsan a tum deuh ni a ngaih theih turin thu a sawi tlat mai. RS-a hian kumin April thla aTangin thil danglam a awm dawn niin a sawi a, a hla lar chhuahpui ‘Fuh Chiang Lo Maw’ chu April thla aTang chuan a sa thei tawh dawn lo niin a sawi.
RS-a hi Ningani kalta khan Ramhlun North-a mo lawmnaah zaiin, hetah hian ‘Fuh Chiang Lo Maw’ hla hi a sa a, a zai zawhah mo lawmna kal ten hla dang nei leh tura an au chhuah hnuah ‘Herthuli’ a sa leh a. A hla hnuhnung zawk a sak hma hian RS-a chuan mo lawmnaa kalte chu “Fuh Chiang Lo Maw” a sak an la ngaihthlak theih avangin, “In vannei hle mai,” a ti fiamthu a, chutah thutak deuh zawkin, “He hla hi April thla aTang chuan ka sa thei tawh dawn lo, March ni 31 thleng chauh ka sa tawh ang,” a ti.
RS-a hian eng vanga ‘’Fuh Chiang Lo Maw” hla hi sa thei tawh lo tur nge a nih tih a sawi dawn zuau a, mahse, insum lehin, “Lo ngaichang rawh u, min lawmpui ngei ngei ang,” a ti leh ta zawk a. Hetiang Tawngkam a neih takah chuan RS-a hian lengzem hla sak chawlhsan a tum a ni ang tih ngaihdan a rawn piang nghal a ni.