Ruihhlo vangin mi 28-in nunna chan tawh

Ruihhlovin kawng hrang hrangin Mizoram a tibuai a, nunna hlu tak chan phah pawh an awm a, kuminah vanduaithlak takin mi 28-in ruihhlo vangin nunna an chan tawh.
Mizoram Excise & Narcotics (MEN) department chhinchhiah danin, July ni 23 thlengin kuminah mi 28-in ruihhlo vangin nunna an chan tawh a, mipa 25 leh hmeichhia pathum an ni.
Nikum khan ruihhlo vanga nunna chan zat hi a pung vak a, mipa 100 leh hmeichhia 18-in nunna an chan. 2025 kha 2005 hnua ruihhlo vanga nunna chan an tam ber kum a ni.
MEN department hian 1984 atangin ruihhlo vanga nunna chan zat hi an chhinchhiah a, kumin July ni 23 thlengin mi 2025-in ruihhlo vangin nunna hi an chan tawh. Mizorama ruihhlo vanga nunna chan an chhinchhiahte hi mipa 1778 leh hmeichhia 247 an ni.
An chinchhiah tan kumah hian pakhatin nunna a chan a, mipa a ni. 1991 thlengin 10 an tling ngai lo a, 1992-ah 12-in nunna an chan.
1984 atanga 1990 thleng kha chuan ruihhlo vanga nunna chan hi mipa vek an ni a, 1991-ah hmeichhe pakhatin nunna a chan.
MEN department chhinchhiahnaa a lan danin, spasmo proxyvon/parvon spas hun lai kha ruihhlovin thihna a thlen nasat lai a ni a, he damdawi hi tunah chuan a chhuak tawh lo.
Heroin a hluar mek a, ganja pawh a hluar. Khuh damdawi a hluar bawk. Vanneihthlak takin meth (methamphetamine) lakah Mizoram a la himah ngaih a ni a, meth leh opium te man tur a awm ve deuh reng na a, hmun danga mi tur a lo ni thin an ti.