Russia-in hypersonic missile a hmang

Russia-in missile hmanga Ukraine a beih avangin nunna chan mi pakua an awm a, Russia hian hypersonic missile pawh a hmang tel hial a ni.
Mahse Russia hian a chhuanvawr Kinzhal hypersonic missiles- air defence bum thei pawh a hmang hial a ni.
Tuna Russia-in Ukraine a beihna hi kar tam tak chhunga a beih nasat ber niin hei vang hian Europe a nuclear plant lian ber Zaporizhzhia atanga power pekchhuah chu tihtawp lailawkin a awm phah a ni.
Russia defence ministry thupuangtu Igor Konashenkov chuan, “High-oprecision long-range air, sea leh land a hman theih ralthuam te hman a ni a, chung zingah chuan Kinzhal hypersonic missile system pawh a tel a, Ukraine military infrastructure pawimawh a kapfuh a ni,” tiin a sawi.
January thla hnua Russia in Ukraine a beih nasat ber anga ngaih a ni a, Ukrinian military te chuan cruise missiles 34 bakah Iran siam Shahed drone pali an kahthlak thu an sawi a.
Mahse Kinzhal ballistic missiles paruk te chu an hmuh theih loh thu leh hei bakah hian ralthuam dang Kh-22 anti-ship missies leh S-300 anti-aircraft missiles ang te chu an tihchhiat theihloh hrim hrim thu an sawi bawk.
“Tun hi hun eng emawti hnua missiles hrang hrang hmanga min beih lehna hmasa ber a ni” tiin Ukrainian air force thupuangtu chuan a sawi a, “Tun anga nasa a mi beih a la awm lo” a ti bawk.
A hma lawkin President Vladimir Putin chuan ri aia a let ngaa chaka thlawk thei ballistic hypersonic missile lamah Russia chuan investment a tih nasat thu a lo sawi tawh bawk a.
Nuclear energy operator Energoatom te chuan Zaporizhzhia plant beihna avangin Ukrainian power system leh facility inzawmna chu chhutchah lailawka a awm thu a sawi a. Russia-in kum khat kaltaa he facility a beih atanga tum ruk lai power an pekchhuah theih lohna ni tawhin diesel generator te hmangin a hnu lawkah erawh tihnun a ni leh thung.
“External power neih theih loh a nih leh avangin Zaporzhzhia Nuclear Power Plant chuan dinhmun hlauhawm tak tawng leh a ni” tiin Rafaeli Grossi, International Atomic Energy Agency (IAEA chuan a sawi a. He nuclear plant a radioactive material te tidai turin electricity chu tihmakmawh a ni.
Zaporzhzhia Nuclear Power Plant humhim a nih theih nan hian khawvel ram hran hrangte chuan hmalak ni se an ti hial a, a chhan chu he plant hian Europe tana pawimawhna thuk tak neiin power an hman tam tak te chu he plant atanga pek chhuah a nih vang a ni.
Russian missile te hian Odesa a energy facility pawh fuhin hei vang hian kawlphetha neih theih a ni lo tiin governor Maksym Marhenko chuan a sawi a, mihring chenna in pawh fuhin mahse thi leh hliam an awm lo a ti bawk.
Hetihlai hian Ukraine military te chuan Russian forces ten Bakhmut khawchhak lam zahve an thunun tia an sawi chu hnawlin he khawpuia Russian sipaite chu an nawr tawm mek thu an sawi thung. Moscow chuan Bakhmut hi thla tam lak a tum tawh niin tun thlengin a la la thei lo thung a ni.
Bakhmut beihna hi nikum September atang khan tan niin Russia chuan he khawpui lak tuma a beihna ringawtah hian sipai 20,000 atanga 30,000 vel a chan phah tawh nia sawi a ni.