Sabrina Carpenter ‘Short n’ Sweet’ a thlum tharleh
Sabrina Carpenter album ‘Short n’ Sweet’ chu Billboard 200 (albums) chart No.1 a ni a, he chart-ah hian a zawn lovin kar li a No.1 tling ta a, Billie Eilish ‘Hit Me ard and Soft’ pawh top 5-ah a rawn lang thar ve leh ta bawk.
Short n’ Sweet hi September thla tir chart No.1-ah a debut a, kar thum chhunga a zawna a No.1 hnuah kar hnih chu a tawlhsawn ve zuai a, Travis Scott ‘Days Before Rodeo’ leh Future ‘Mixtape Pluto’ te No.1 theih nan kawng a kian a, tunah a No.1 leh ta a ni.
Billboard 200 chart hi kar khat chhunga US-a album lar dan tehna niin, album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Sabrina Carpenter ‘Short n’ Sweet’ hi kar khat chhungin US-ah 1,00,000 an hralh leh a, chung zingah 85,000 chu streaming atanga album hralhna tlukpui (on-demand official stream maktaduai 114.24) niin, album tak tak hralh chu 14,000 a ni a, album-a hla mal hralhna atangin 1,000 a tling thei bawk.
Chappell Roan ‘The Rise and Fall of a Midwest Princess’ chu 63,000 hralh lehin No.2-ah bawk a la awm a, chart No.1 hlui Future ‘Mixtape Pluto’ chu 55,000 hralh lehin No.1 atangin No.3-ah a tawlh a, chart No.1 hlui bawk Morgan Wallen ‘One Thing at a Time’ chu 50,000 hralh lehin No.5 atangin No.4 a kai thar leh a, Billie Eilish ‘Hit Me Hard and Soft’ pawh 50,000 tling lo deuh hralh lehin No.8 atangin No.5 a kai thar ve leh ta bawk.
Chart No.1 hlui Post Malone ‘F-1 Trillion’ chu 47,000 hralh lehin No.4 atangin No.6-ah a tawlh a, chart No.1 hlui bawk Taylor Swift ‘The Tortured Poets Department’ chu 44,000 hralh lehin No.7-ah bawk a la awm a, Noah Kahan ‘Stick Season’ chu 37,000 hralh lehin No.10 atangin No.8 a kai thar leh a, Zach Bryan ‘The Great American Bar Scene’ chu 32,000 hralh lehin No.11 atangin No.9 a kai thar leh a, chart No.1 hlui Morgan Wallen ‘Dangerous: The Double Album’ chu 32,000 hralh lehin No.12 atangin No.10 a kai thar ve leh ta bawk.