SAFF Championship 2023 final: Title hum turin India inringtawk

SAFF Championship 2023 final:
Title hum turin India inringtawk
A tum fo leh a hneh loh fo tawh Lebanon nen Inrinni zan semi-final minute 120 chhunga goal an thun zawh loh ve ve hnu penalty petah India chuan 4-2 hnehna changin SAFF Cham-pionship final an lut hram a, zanin dar 7:30 hian group stage-a an draw-pui tawh Kuwait nen final an khel ang.
India hi kum 2005 atang khan India leilunga final match an khelh tawhah an la tlawm ngai lo a, hei vang hian inrintawkna sang tak an nei tih assistant coach Mahesh Gawli chuan sawiin, champion lai leh home team an nihna zawna ‘pressure’ an sut tel tur pawh mittlung taka an suttlang theih a beisei thu a sawi.
Defending champion India hian SAFF Championship-ah na na na hi chuan record chhuan-awm an nei a, Bengaluru khaw final-a an chak leh chuan an vawikaw champion-na a ni tawh ang!
Zanin match hi he tourna-ment kal laia team pahnih insut vawihnihna tur niin, karliamta Group A match-ah khan 1-1-in an lo inhnehtawk tawh a, Kanteerava Stadium-a an intum leh turah hian home supporter chakna thahrui nen a thlengtu Blue Tigers chu rinkai zawk an ni.
Bengaluru khuaa semi-final match extra time thlengin defending champion India tan captain Sunil Chhetri chuan goal khung zo lo mah se penalty shootout-ah a chhuihlut a, ani bakah Anwar Ali, Mahesh Singh leh Udanta Singh-te’n thunin, a vawi 13-na’n India chuan Asia chhim lam ram bikte football-a inelna lianah final an khel dawn a, tun hi a zawna final match vawikua an khelhna tur a ni nghal.
He tournament vawi 13 an khelh tawhah India hi vawiriat champion tawhin, a sang pahniha an tel phak loh awmchhun chu kum 2003 chiah kha a la ni.
Penalty petah Lebanon tan Walid Shour leh Mohammad Sadek-te chauh an hlawhtling a; India goalkeeper Gurpreet Sandhu chuan Hassan Maatouk-a pet dansakin, Khalil Bader chuan goal kham chungah a petchhuak bawk.
Tun kha Lebanon laka a zawna India vawihnih chakna niin, tunhnai Odisha lama Intercontinental Cup-ah khan sihnih faiin Arab team hi an lo hneh tawh a ni.
Semi-final lehlamah Kuwait chuan sikhat faia Bangladesh hnehin final an lut ve bawk.
June ni 27-a Kuwait nen an inhnehtawk tuma red card a hmuh avangin India head coach Igor Stimac chu match hnih chhung atan SAFF disciplinary committee-in a hrem a, zanin hian touchline atangin a team a kilkawi thei dawn lo a, assistant coach Mahesh Gawli hoin Arab team an hmachhawn ang.
Croatian coach hian an bultanna Pakistan game-ah khan red card a lo hmu tawh bawk a, khami tum kha chuan SAFF disciplinary committee lam ngaihtuah turin a tihsual putluh a ni lo a, match khat hremah a tlingtla thei mai a, Kuwait laka hnawhchhuah a nih leh hnuah a ngaihtuah turte’n a chungchang an rel hnuah match hnih chhung atan hremna an tichhuak ta a ni.
India team hi inhnaih taka tournament pahnih khel an nih avangin an fitness a ngaihtuahawm deuh ang em tih zawhna a piang a, hemi chungchangah hian Gawli chuan an strength and condi-tioning coach Luka Radman chuan mittlung takin a hna a thawk tih sawi chungin an player-te’n hliam buaipuiawm an la nei lo zel a, han insawhsil deuh pawh an awm lo tih a sawi.
Hetih lai hian India hma-tawng rinrawl Chhetri chuan Lebanon game khelh zawh khan bai lek lek chungin khelmual a chhuahsan a, mahse, Gawli fitness lama harsatna nei player an awm loh thu a puang!
Zanin final-ah hian an manager-in kaihruai thei dawn lo mah se Pakistan leh Kuwait an khelh tuma yellow card a hmuh ve ve avanga semi-final lama Lebanon hmachhawn ve thei ta lo defender pawimawh Sandesh Jhingan khan khelmual a lut leh thei tawh dawn a; Lebanon laka Jhingan hmunruak luahtu Anwar Ali pawh kha a chetha ngang mai a, Lebanese tlarhma goal bawh dangchattu langsar a ni.
Veteran defender Jhingan pawhin a theih loh hlana Lebanon laka a hmunruak luahtu Anwar fakin, lung lam harsatna chi khat (Hypertrophic Cardio Myopathy)-in tlakbuak mah se rilru paukhauh takin a inlan tih a sawi a, Lebanon laka a khelh that thu leh player an thlapwna kawngah Anwar-a chhungte a fak tel.
Thawhtanni vek khan Jhingan hian Kuwait laka hnehna an chan ngei a rin ngheh tlat thu sawi chungin, “Kuwait hi team tha an nih piahlamah tawnhriat ngah coach-in a enkawl avangin game hautak a ni leh dawn. Technical player an kawl nual a, mimal thlurbing pawha player tha tak tak an ni hlawm. FIFA ranking (141) kan thlir chuan an phu tawk aiah hniamah an awm tih kan hre vek a; second 10 chhung lek pawh an laka kan tihtur kan hlen loh vaih chuan goal an khung a ni mai,” tiin an tumpui tur a fak zet a, anni lam pawh khel chhe bik awm loa tha taka khelho an nih avangin an chak lohna tur chhan a hmu lo!
Tarlan tawh thin angin, India team-ah hian Mizo player pahnih Lallianzuala Chhangte leh Lalengmawia Ralte an awm.