Sawhthing leikhawm chhiarkawp…
Tun tum 9th Legislative Assembly session kal meka finance changtu chief minister-in budget a pharh takah khan, kum 2025-26 chhunga sum hmanna tur ruahman langsar zual tarlan zingah hand holding scheme hnuaia sum hman tur dah chu cheng Vbch 350 a ni.
Tun dinhmunah, Agriculture changtu minister-in Assembly Session-a a sawi danin, sawhthing leikhawm sa hi metric tonne 1997 a tling tawh a, metric Tonne 88 chu hralh chhuah a ni tawh bawk.
Metric Tonne 1997 hi a Kg zawng chuan 19,97,000Kgs a ni a, Kg khat cheng 50 zela sawrkarin a lei hian cheng Vbch 9.985 a seng tawh tihna a ni a, hei hi hand holding scheme sum vbch 350 atangin 2.8% tihna a ni.
Thlai pali lei tur ruahman zingah sawhthing hi a sum hrawm na ber tur a nih a rinawm a. Sawhthing lei nan hian vbch 200 han target chhin ila, chu chuan sawhthing metric tonne 40,000 (quintal nuai 4) vel a lei thei dawn tihna a ni.
Sawhthing hi a tirah kha chuan June thleng lei tura tih a ni a, mahse lei leh hralh zung zung theih a nih tak loh avangin hun bituk hi hlih a ni ta a, sawhthing leisak chhung chu support price pek an tum tih tun hnai khan sawrkar lam chuan an sawi leh ta a ni.
A enga pawh chu lo ni se, Assembly Session neih lai la laa ‘sawrkarin sawhthing chuti zat chu a lei tawh a, chuti zat chu a hralh leh tawh’ tia sawi tur a han awm hrim hrim ta te pawh hi hmasawnna mel lung chhinchhiahtlak tak chu a ni phawt mai. Support price pekna tur thlai dangte pawh an pawimawh tho a, mahse sawhthing hi UT hlim atanga lo buaipui ngar ngar tawh, lei rem la rap hleithei lo, a chang chuan han leikhawm ve bawk mah se, kawngsira dah tawih mai mai te kha a ni thin a. Tunah hi chuan awmzia a nei ve deuh dawn ta a ang hle a, hei hi ‘Sawhthing mel lung thar’ a tih theih awm e.
Chutih rualin, ‘Rinawmna’ tel lo chuan ‘hlawhtlinna’ hi a hlawh chhuah theih loh a, system fel leh tha tak hi awm mah se, a zawmtu tur ten inthuruala an zawm duh tlat loh chuan awmzia a awm tak tak thei lo. Rinawmna hmachhuanin, Sawhthing hi kuthnathawktute leh state economy dawmkangtu lo ni mawlh teh se.