Sawrkar hnathawk vau nasaah puh

ZPM sawrkar chu thla 9 chhung chauh an la sawrkar chhungin sawrkar awm tawhte aia mipui fairel bel rawk nasa ber leh sawrkar hnathawk vau nasa ber an ni tih MNF hruaitu Zodinpuia chuan a sawi.
MNF office Mizo Hnam Runa-a thu a sawinaah MNF general secretary Zodinpuia chuan ZPM sawrkar chu party bil sawrkar dik tak a ni, tiin, mipui sum hmanga an party hotute intuamhlawmna pawh kum khat chhungin Rs. 2518,00,000 chuang a ni tawh a, heti chung hian mipui chu kawngchhe karah chhiah tam tak chawi turin min hnutchhiah tawp niin a sawi.
Buhfai man pawh zaah zaa an tihsan dawn avangin card var hmang chhungkaw 111840 chu mangang takin an awm mek nia sawiin, “Mipui rawngbawl saktu nih in hre lo, sumdawng company emaw inti tlat sawrkar hnuaiah mipui an rum mek a ni,” a ti.
Chief minister Pu Lalduhoma chu a minister zinga a ngaihtheih loh deuhte department chan nasa taka sawisel thinah MNF hruaitu hian puhin, “Hmanni lawkah Pu K Sapdanga chan Home department nasa takin a sawisel a, tunhnaiah Pu Vanlalhlana enkawl PWD engineer-te chu contractor-te nen a ruka inthurual a, nasa taka eiru a ngaih theih turin a puh leh a. Tun sawrkar tluka Mizoram sawrkar hnathawkten vauna an tawh nasat hi a la awm loang,” a ti.
ZPM chu an intiamna ang ngeia kal tura a beisei thu sawiin, mipuiin an intiamna hmangin an x-ray mek tih a sawi a ni.