Sawrkar leh mipui inkara lei dawhtu ni zel turin I&PR fuih

Ram rawng bawlnaah public relations a pawimawh avangin Information & Public Relations thawktute chu sawrkar leh mipui inkara leihlawn dawhtu ni zel turin an department minister Lalruatkima chuan a chah.

Information & Public Relations directorate-a thawkte hian Thawhtanni khan inthlantharna hun an hmang a. Hmanpuitu IPR minister chuan kum 2020 March atanga Covid lengah I&PR department chu a hma zawng aia buai zawka hun hmangin, mipui kawng kawhhmuh leh thudik hrilhhriat hna tha taka an thawh avangin lawmawm a tih thu a sawi.

Thudik tawk lo social media-ah a darh chak em em laiin, sawrkar thuthar thehdarhnaah hmasawnin I&PR department chuan an la in, twitter, instagram leh a dangahte thahnemngai takin mipui rawng an bawl a, thudik leh rintlak hre turin mipuiin an thuchhuah an ngaichang thin tih a sawi bawk.

I&PR enkawl journalist te, film siamtu leh art, photography lama tui pawl hrang hrangte nen inrem taka kal dan thiam a pawimawh, tiin Lalruatkima chuan, “Ram rawng kan bawlna kawngah hian public relations a pawimawh a, mipui leh sawrkarin inlaichinna tha a neih theihna tura min pawthnaitu, leilawn dawhtu department kan nih anga thahnemngai taka thawkin, tang zual zel ang u,” a ti.

District thar – Khawzawl, Hnahthial leh Saitual-ah DIPR office hawn phalna te, DC office building-a an awmna turte sawrkarin an mamawh tih hria in a buatsaih chho zel tih IPR minister hian a sawi a. Serchhip district-a DIPR office pawh sawrkara an dil angin sanctioned post-a hlan a nih tawh thu te, PWD lamah post thar an neih belh bakah combined MPSC 2022 kaltlanga MIS post 4 an neih belh thu te, sawrkarin Mizoram Information Service indaihlohna hriain kumin atan post 5 a phalsak leh thu te, pension-in hotu thenkhat chhuah mah se, mitharin min belh zelin, department-in hmalak tawhna tam tak nei mah se, hmasawnna tur tam tak a nei tih a sawi a ni.

I&PR director C. Lalnunkima chuan department enkawltu minister viaktha leh engkim chik, thahnem ngai leh remhre tak an neih avangin lawmthu a sawi a. He hunah hian I&PR secretariat – joint secretary Betsy Zothanpari Sailo leh midangte an tel a ni.