Sawrkarin min chhui phalna pe mah se, bail lak lawk ka tum lo – C Ngunlianchunga, MLA

On May 13, 2025 45 0

Sawrkarin min chhui phalna pe
mah se, bail lak lawk ka tum lo
– C Ngunlianchunga, MLA
Lawngtlai by pass road kaihhnawihah sawrkarin court-a a chungchang thu ngaihtuah phalna pechhuak tawh mah se, tih dik loh a neih a hriat loh avangin anticipatory bail lak a tum lo tih MLA C Ngunlianchunga chuan a sawi.
Thudawn danin C Ngunlianchunga thubuai hi Anti Corruption Bureau (ACB) chuan chhuizoin court-a a chungchang ngaihtuah a nih theihnan sawrkar phalna ‘prosecution sanction’ an dil a. Chu dilna chu pawm a ni tih District Council & Minority Affairs secretary chuan larsap hmingin 2025 April 29 khan a tichhuak. ACB hian IPC section 120B/409/34 leh Prevention of Corruption Act 1988 section 13 (1)(a)(b) leh 13 (2) tlawhchhanin an ziaklut a ni.
Lawngtlai West bialtu MLA C Ngunlianchunga chuan LADC CEM a nih laiin, FCI kudam pawh turin Lawngtlai by pass road siamna tur concept paper an siam a, DoNER ministry-a detail project report an thehluh chu lo pawmsakin, cheng vaibelchhe 1000 chuang hu an hmu tih a sawi.
Kawngpuiin a suttlang turah mimal ram a awm nual a, he project-ah hian ram laksakte tan compensation pek theihna bilh telh a nih loh avangin, ram neitute hi tawngkaa inremsiam pui dan a ngaihtuah a, thei leh thlai chingte hnenah, zangnadawmna pawh ni chiah chuang loin, Rs. 20000 theuh, ram awlah Rs. 10000 vel pek turin an inrem a; 2013 August-ah DoNER atangin 1st instalment cheng nuai 457.54 a lo chhuak a, MLA-a thlantlin a nih tak avangin he sum hi a khawih zui duh loa, minister a ni zui ta bawk tih a sawi a ni.
Mi 173 hnenah Rs. 10000/ 20000 te tea pek tura tih chu a pek dan a dik tawk lo nge, a project pawhin a tawrh phah a, a zuzi zui ta niin C Ngunlianchunga hian a sawi bawk.
Lawngtlai District Vigilance & Monitoring Comimttee chairman-in Anti Corruption Bureau-ah hemi kaihhnawih complaint thehlutin, heta tanga kal chho zel ta hi a ni tih a sawi a. Amah an ‘charge’ na ber hi, thuneihna hman sual (misuse of power) a ni tih a sawi a ni.
“Assembly Session-ah chief minister-in anticipatory bail i lak a ngai ang, min ti a. Ka lak loh tur thu in ka chhang. Tih dik loh ka nei loa, cheng khat pawh ka tichingpen lo. Mi ka inremsiam pui mai a ni a, chumi avanga tan a tul a nih chuan ka inring reng a ni. Kan ram leh khawtlang hmasawnna tura CEM ka nihna avanga tuar a ngai a nih chuan jail bang zut chauh ni lo, a tawp thlengin ram leh hnam tan chuan ka kal dawn,” LADC CEM hlui hian a ti.