Sawrkarin ruang 100 chuang phurh man a ba – Lalruatkima

Sawrkarin ruang 100 chuang phurh man a ba
– Lalruatkima
Mizoram sawrkarin ruang phurh man a tumsak dawn hnu ah tunah hian ruang 100 chuang phurh man a ba mek a, hetiang hi tunhmaa MLA-ten an tih mai thin, thil la awm ngai lo a ni tih MNF treasurer Lalruatkima chuan a sawi.
Thawhlehnia Aizawl South-III MNF South Block-in party workers meet an buatsaih a hmanpuinaah MNF treasurer chuan, ZPM sawrkarin puk chawpin min kalpui mek nia sawiin, “MNF sawrkar chhunga puk zat kha tun thla 11 velah hian an puk der tawh. He sawrkar kan enchhin hi a fuh lo tih a lang zel a; tunah hian ruang 100 chuang phurh man an ba. Hetiang hi tunhmaa awm ngai lo leh MLA-ten an tih mai thin a ni. Tar pension, mid-day meal adt. an pe thei lo,” a ti.
Sawrkarin buara ip ruak pawh an it a, hetiang hi thil awm ngai lo a ni, tiin Lalruatkima hian a sawi a. Kum khat awrhah hian sawrkar hnathawk leh mipuiin an ning tawh em em niin a sawi bawk.
“Kan chief minister chu Delhi-ah a zin a, a thusawi avangin national news-in an chuk rawn luai luai mai. Tawng thiam an tih, an MP chuan Manipur-a kan unaute tan tan lak ngaihna a hre loa, MNF MP chuan Manipur chu President Rule-ah dah turin a ti ngam,” a ti.
ZPM sawrkarin VC term tihtawi an tum chhan chu an sawi dan a inang lo vek tih MNF hruaitu hian sawiin, “Pawisa awm loh vang an tih hi sawrkar hmasate chuan chhuanlamah kan hmang ngai lo. Covid lai pawhin inthlan kan kalpui thei,” a ti.