Sawrkarin school 51 a provincialise A dinnaah sawrkar a dingnghet ang: – Education minister

Mizoram sawrkar chuan adhoc school 51 chu provincialise turin a tifel a. Henga tel ve lo ho chu special category hnihah leh lumpsum aided school-ah a then hrang. Tuna sawrkarin ruahmanna a siam chu dan tanchhan leh data fel tak nei chunga ti a nih avangin an dinnaah an dingnghet dawn tih Education minister Dr Vanlalthlana chuan a sawi.
School Education minister-in thuthar thehdarhtute a hrilh danin, sawrkar sikul atana Council of Minister pawm takte hi kum 2023-a sawrkar notification behchhana tehfung pha ho an ni a. An zing ami, Special Blind School Durtlang chuan tehfung hi pha lo mah se, vohbik enkawlna hmun, ngaihhnathiamnaa en an ni a, chumi atan chuan a hmaa dan leh notification-a awm lo ‘power to relax’ clause dah belh hmanga tih a ni tih a sawi.
Pawm tak higher secondary school zingah Ngopa HSS chuan tehfung – 80% pass percentage leh enrolment 80/40 a pha lo ve bawk a, pass percentage-a a phak lohna zawk hi ngaihdam a ni tih a sawi bawk.
“Kum 2023-a enrolment criteria pha lo pawh kum 4 chhunga enrolment chawhrual, 2025 enrolment leh 2026 enrolment atanga criteria an rawn phak chhoh chuan provincialise tur zingah telh an ni,” a ti. Kum 2023 criteria pha si, kum 2026-a an enrolment tlahniam nasa ta lutuk ho chu an sikulah kalchilhin endik nghal an ni dawn tih a sawi a ni.
Provincialise tak loh adhoc school ho chu special category-1 ah dah an ni anga, thawk mekte pawh zirtirtu nghet (regular) angin ‘full basic pay leh allowance’ an la dawn a; tunhmaa an neih thin ‘death -cum- retirement -gratuity’ atan cheng nuai 4 pek leh an ni dawn ti Dr Vanlalthlana hian a sawi.
The Mizoram Education (Lumpsum Grant -in- Aid for general Maintenance of Private School) Rules 2025 hmangin provincialise tak loh adhoc school leh provisional adhoc ni tura lo tih tawhte chu ‘special category 1’ leh ‘special category 2’ ah dah vek an ni tawh dawn a. 2023 notification-a tehfung hautak deuh chu an tihhniam rualin, school an tlakhniam chuan an dinhmun a tlahniam thei a, zirtirtute tan nasat a ngai dawn tih a sawi a ni.
“Provincialise tak lohte hi kan ngaihsak lo bik tihna a ni loa, tehna awm sa hmangin adhoc school-te tan, huamzau thei ang berin hma kan la a ni zawk tih min hriatpui turin ka ngen a ni,” Education minister hian a ti.
Zawhna chhangin minister chuan, khawtlangin an din chu duhsak bik an duh a, a dinna a rei tawh tih vang ngawta tehfung pha lo leh private enkawl ang chi tan luh theih a ni lo tih a sawi. “Data kan nei tha a, hemi nen hian kan insawifel thei zel turah kan ngai. Dan thar kan zam a, chumi ang chuan an rawn kal ve mai turah kan ngai bawk. A thutluknaah sawrkar a ding nghet ang,” a ti.
Sawrkar school-a heti zat an luh tak avang hian zirtirtu leh thawktu dang a ken tel loh theih lohte nena hlawh leh tul dang, HSS-ah cheng vaibelchhe 120 ai tlem lo, HS-ah vbch. 210 aia tlem lo. MS-ah vbch. 30 aia tlem lo, a vaiin vbch. 360 aia tlem lo an mamawh dawn tiin zawhna a chhang a ni.