School sports atan zirlaite hnenah pawisa khawn – AAP

Aizawl District Secondary School Sports 2024 atan school naupangte chu Rs.20 pe turin School Education department-in a ti tih AAP Mizoram chuan sawiin, sawrkar buatsaiha zirlaite atanga sum khawn ngai chu hriatthiam har an tih thu an sawi.
AAP Mizoram hruaitute sawi danin, October 7-11 chhung hian Aizawl District Secondary School Sports 2024 chu neih a ni dawn a. School aupang zawng zawng – private leh sawrkar school tel vek tura hriattirna District Education Officer office atangin lehkha hmuh niin, naupang tin atangin he sports-na atana Rs.20 pe vek tura hriattirna school zawng zawngah thawn chhuah a ni tih a sawi.
He sports neih tur hi School Education department-in school calendar a siamah a awm tih sawiin, Mizoram-in zirna tha a neih theihna tur leh zirlaite harsatna an lo auchhuahpui ve tawh thin a; tuna zirlaite sports-na tur sawrkar buatsaihah zirlaite atanga pawisa khawn chu a hriatthiam har an tih thu an sawi.
‘Mizorama zirlai zawng zawng tel theihna, co-curricular activities – sports buatsaihna khawp pawisa (budget) a dah thei lo hi a runthlak kan ti a. Sports hlawhtlinna tur indaih lohna nu leh pate atanga khawn ngai hi sawrkarin zirna a ngaihpawimawh lohzia tilangtu leh mipui zahlohna lian tak a ni,’ AAP Mizoram chuan a ti.