Sean Combs kum 4 chuang jail tang turin a chungthu rel

Sean Combs kum 4 chuang jail tang turin a chungthu rel
October ni 3 khan Sean ‘Diddy’ Combs chungchanga thutlukna Manhattan-a federal court-in a puang a, Judge Arun Subramanian chuan thla 50 chhung jail bang zut turin a ti. Sean Combs hi tihluihna a nawhchi inzawrhtirna rawngkai case-ah thiam loh chantir a ni a, a case hi khawvelin a ngaihven hle a ni.
Judge Arun Subramanian chuan Sean Combs hremna chu hmeichhia te chunga hleilenna leh zahmawh rawngkaia intihluihna leh intihbawrhbanna chu en liam mai mai theih a ni lo tih lantirna a nih nghal thu a sawi.
Rapper leh sumdawng hausa, rimawi kawvela huhang nei lian berte zinga mi ni thin Sean Combs hian rawva leh ngialngan tak taka zahmawh lam thila intihhlimna hun, ‘freak-offs’ leh ‘hotel nights’ an tih mai a buatsaih thin ni a puh a ni a, heng intihhlimna atan hian a hmei a pain tisa châkna uchuak taka hrikthlak nan an inhmang kual vel thin niin puh a ni bawk a, heng thilah a huaihawttu leh a meizang hlaptu berah a tang thin a ni.
Sean Combs-a ukil chuan hei aia hremna nêp deuh zawk ngiatin, jury ten Combs puhna tam zawk chu evidence tha tawk lo leh mumal lo tia an hnawl bawk avangin thla 14 aia rei lo jail tan hi a ngiat a, mahse, judge-in hei hi a hnawl sak ve thung a ni.
He case-ah hian Sean Combs-a ngaihzawng hlui pahnih, singer Casandra Ventura, Cassie an tih mai leh, Combs-a ngaihzawng hlui dang, a hming tak hmang lova ‘Jane’ tih hminglem a hmang te pawh thuhrettu-ah tangin, court-ah hian an inlan a, anni hian hetianga Sean Combs-a ‘freak-offs’ a tihbawrhban lo tawk tawh niin an insawi a ni.
Sean Combs hi nikum September thla khan man a ni a, heta tang hian thuneitute kutah a la awm zui ta reng a, hei hi tuna a hremna tura an puan, thla 50 jail a tan turah hian a tan tawh anga lak tel a ni dawn a, hei bakah hian a jail chhungah a nungchang a that chuan a tan hun hi an pawt tawi sak leh hret thei dawn bawk a, heng zawng zawng nen hian kum hnih leh a chanve vel tal chu a la tan belh ngeiin a rinawm niin sapram media ten an tarlang.
A laka hremna tur puan hmain, Sean Combs hian judge chu a chunga zahngaihna lantir turin a ngen a, minute 12 chhung thusawiin, a ngaihzawng hlui te chungah pawh thupha chawiin, a chhungte leh vantlang lakah thupha a chawi nghal a, a thil lo tih tawh te chu tenawm leh zahthlak tak a nih thu a sawi tel a, a tawpah, “Miten engpawh an sawi ang, hei hi sawi ve ka duh, engkimah khan pawi ka tiin ka inchhir takzet a ni,” a ti.
Judge hian thla 50 jail tang tura a tih bakah dollar 5,00,000 chawi turin a ti, uchuak taka zahmawh rawngkai intihhlimna hun a lo buatsaih tawh thinna hmun, thiam loh chantir a nih phahna case nena inzawmna neite pawh a neitu nihna hlihsak turin a ti bawk.