Seat hauhsak hmeichhiate inbuatsaih lawk turin chah

MP leh MLA inthlanah hmeichhiate tan seat zaa 33 hauhsak a nih tawh dawn avangin Mizo hmeichhiate pawh MLA chuh a, ram leh hnam tana thawk tura thuthlukna siama inbuatsaih lawk turin MLA DR L Thangmawia chuan a sawm.
MHIP Ngopa Block chuan September 28 & 29 khan Ngopaah Block Conference leh an kum 25-na tlin, Silver Jubilee an lawm a. Hmanpuitu Lengteng bialtu MLA Dr L Thangmawia chuan MHIP Ngopa Block-in Silver Jubilee a thleng chu a lawmpui thu sawiin, Mizo hmeichhiate an chhuanawm chho hle a, zirna lamah Board leh University exam hrang hrang leh MPSC leh MSSSB exam ah mipa tam takte tluk lohin a hmasa lamah an hming a tlar dul thin a, hei hi an lawmpui awm em em rualin, Mizo mipate tan chona nasa tak min hmachhawn tir tih a sawi.
Tunhnaiah Lok Sabha leh Rajya Sabha-in lungrual takin MP leh MLA inthlanah 33% hmeichhiate tan seat hauhsak (reserve) tur thutlukna an siam tih sawiin, “He dan hman a nih hunah chuan Mizoram MLA bial 40-ah pawh bial 13 hi hmeichhiate tan hauh sak a ni tawh dawn. Chutih laiin hmeichhiate tana seat hauh sak sa VC/LC leh Municipal Council-ah hmeichhe candidate tur harsa taka a zawn a zawn chawp ngaihna a tam thin a. Chuvangin Mizo hmeichhia chhuanawm tak takte mahni inphat a, mipui leh ram leh hnam tan thawk tura thutlukna lo siamlawk turin ka ngen a ni,” Dr L Thangmawia hian a ti.
Ngopa Block MHIP hian Pawlrang, Ngopa, Lamzawl, NE Khawdungsei, Khawkawn, Chiahpui, Kawlbem, Teikhang, Hrianghmun leh Mimbung khua a huam a ni.