Tunlai hmasawnna thang zel mila police-ten mipui leh dan bawhchhetute an hmachhawn a, hnuchhui an thiam theihna’n leh dan hriatna lama an hriat tur te inhrilhin Thawhtanni atang khan Serchhip leh Lunglei district police-te an intuaithar.
Superintendent of Police Serchhip District buatsaihin district chhunga police station pathum – Serchhip PS, N Vanlaiphai PS leh Thenzawl PS-a officer leh thawktute tan ni hnih chhung awh In-Sercvice Training chu Thawhtanni khan neih tan a ni.
SP Stephen Lalrinawma chuan tumah dan chunga leng kan awm loa, dan lekkawhtu police-te ngei pawh dan bawhchhia an awm chuan man theih kan ni, tiin, an hnathawhnaah an thawh chhan mipui tana tangkai lehzuala an thawh theihna’n training hi thla thum danah an buatsaih thin a, tun tum training hi tun sawrkar kuma a hnuhnung ber a ni, tiin a sawi.
Resource person, I&PR deputy director K. Saitluanga chuan ‘NGOs/Media, their co-operation with Police’ tih thupui hmangin zirtirna a pe a. Training chhung hian thupui hrang hrang hmangin resource person sawm bik dangten zirtirna an pe bawk a ni.
Lunglei Police thawktute tan pawh ni thum In-Service Training hi neih a ni a. SP Rahul Alwal chuan police-ten tha taka hna an thawh theihna’n te, mipui leh police inkarah inhriatthiam tawnna, inrintawnna leh thawhhona tha a awm a ngai, tiin, police-te chu anmahni zawn theuhah ‘police public relation’ ti hmasawn turin a chah. Dan leh thupek an kenkawh thinte bel taka hrechiang tur leh mipui, media, NGO leh sawrkar department dang nena an thawhhonaah zaidam leh dawhthei taka hma la thin turin a chah bawk.
Serchhip leh Lunglei police intuaithar
Get real time updates directly on you device, subscribe now.
Next Post