Sevilla an champion

Nilai zan khan Budapest khawpuia Puskas Arena-ah Euopa League final khelh a ni a, vawi ruk champion tawh Sevilla chuan penalty shootout ah Roma an hneh a, a vawi sarih nan an champion. Final-ah an tlawm tum hian Roma manager Jose Mourinho chuan medal a paih a, hei hian titi a siam tam zui hle.
Roma an vanduai
Italian Serie A club lian AS Roma hi manager zingah Europe-a hnuhma nei tha tak Jose Mourinho hnuaiah inring tawk takin an inlan a, Europa League-a champion ngun ber Sevilla lakah khel tha viau mah se vanduaithlak takin an chak zo lo. Roma hian Dybala hmangin hmahruaina goal an thun a, an lama an tih goal palh vangin an champion zo lo tlat thung. Roma lakah derthawng zawk ni bawk thin mah se Sevilla in Europa League an ta neih viau a, ngampa taka inlanin penalty shootout ah chak zawk an ni leh ta nge nge.
A team enkawl tawhte European competition final vawi nga hruai thleng tawha la champion pui vek Jose Mourinho enkawl Roma hian Europe-ah champion zawn tumin thapui an thawh a, Budapest-ah an khel tha viau nghe nghe. Minute 35-naah Gianluca Mancini ball pek fing leh tha tak chu Paulo Dybala chuan a pet goal a, hmahruaina goal a thun. Dybala goal thun bak hi chawlhlawk hmain goal dang a luh belh thei lova, Roma in si khat faia hmahruai chungin chawlhlawk an hmang.
Chawlhlawk hnu lamah Sevilla an khel tha a, goal pawh an thawkchhuak thuai. Minute 55-na lekah Sevilla captain Jesus Navas chuan dinglam atangin ball a cross a, Navas cross hlauhawm tak hi Roma defender Gianluca Mancini chuan an lamah a ti-goal a, Sevilla si phurh a sut sak.
1-1 a nih hnuin inkhel a hmuhnawm zual hle a, boruak pawh a sang tha viau bawk. Player ten referee an hual tuau tuau reng. Mual chhung chauh ni lovin mual pawn boruak pawh a sang viau a, Roma manager Roma leh a assistant pahnihten Yellow Card an hmu ve ve. UEFA chuan final-a Mourinho chet dan hi referee hnen atangin report an nghak mek a. Manager luhlul hi hrem tuar thei dinhmunah a ding mek.
An si phurh an sut hnuin Sevilla an khel tha tulh tulh a, inkhel an thunun telh telh. Minute 70-naah Sevilla player Ocampos chuan penalty a hlawhchhuak hman a. Referee Antony Taylor-a’n penalty a pek hi VAR hmanga ennawn a nih hnuin sut a ni a, Roma an him hlauh thung. Team hnihte hi goal thun tumin innawr tawn viau mah se hun pangngaiah goal dang an thun belh thei lo ve ve.
Hun pangngaiah chak zawk an awm theih loh hnuin extra-time-ah pawh an inhnehtak zui zel a, tie-break hmangin champion tur zawk zawn chhunzawm a ni. Penalty hi Roma player ten an pet chhe viau a, an thelh tlut tlut. Roma tana pettu pali zingah pet hmasa ber Bryan Cristante chiahin a pet goal a, a dang pathumin an hlah zawn vek. Sevilla tan hian Ocampos, Erik Lamela leh Ivan Rakitic ten an pet goal hnuah World Cup-a Argentina chakna goal thuntu Ginzalo Montiel chuan chakna goal a thun a, Sevilla chu Europa League-ah an champion leh ta nge nge a ni.
Europa Leagu-ah a vawi sarih nan an champion hi Sevilla tan a hlu lehzual hle. Anni hi La Liga-ah 11-na an ni mek a. Europa Conference league takngial pawh khel phak lo tur an nih laiin Europa league-ah an champion vang hian season tharah Champions League an khel phak dawn thung. Sevilla hian Europa League an ngam hle a, final vawi sarih khel tawhin an champion vek a ni.