Sorkar laipuiah BJP paih thlak an ni thuai dawn – Mamata

Tun hnaia West Bengal assembly inthlana Trinamool Congress (TMC) an chet chhiat hle hnuah party supremo Mamata Banerjee-i chuan BJP kaihhruai sorkar laipui chu nakin lawkah ‘thuneihna atanga paih thlak’ a nih tur thu a sawi tih party thuchhuahin a tar lang.
Kalighat-a party MLA-te a kawmnaah Banerjee-i chuan, “Ni tam vak lo lo awm leh turah Delhi-ah BJP hi thuneihna atangin paih thlak a ni ang,” a ti.
Inkawmnaa tel, TMC General Secretary Abhishek Banerjee-a pawhin hruaitute chu ‘eng pawh thleng se BJP donaah’ an hnungtawlh dawn lo tih a sawi bawk.
MLA-te hnena thu a sawinaah Abhishek Banerjee chuan Chief Minister Suvendu Adhikari-a chu na takin a sawisel a, “Kan state-ah hian chief minister tam tak kan nei tawh a; mahse, tuna mi ang hi tumah an la awm lo. Thlalaknaa pawisa a lak lai hmuh chu chief minister-ah siam a ni,” tiin TMC thuchhuah chuan a tar lang.
“An duh duh ti rawh se… ka in chu nawr chim sela, hriattirna pawh min rawn pe rawh se… heng thil hmaah hian ka kun lo vang. Eng pawh ni se, BJP ka bei chhunzawm zel dawn a ni,” a ti bawk.
Assembly inthlanah khan BJP chuan hnehna an chang a, seat 207-ah hnehna changin TMC-in kum 15 chhung an state-a rorelna an neih chu a titawp a, seat 80 chauh an la thei.
An chak loh hnu hian TMC chuan assembly inthlanpuiah BJP-in hnehna an chan hnuah West Bengal pumah tharum thawhna a thleng nia sawi chungchangah Calcutta High Court-ah dan roreltute an inrawlh an dil a. Hemi chungchang hi Chief Justice HC Sujoy Paul hmaah an thlen.
Banerjee-i chu kar kal ta Ningani khan PIL kaihhnawiha Chief Justice Pal hmaa inlan turin Calcutta High Court-ah a kal a ni.
An ngenna thehluha tar lan dan chuan inthlan result zawhah state chhung hmun hrang hrangah TMC worker leh an party office-te beihna a thleng a, hal a ni a, thil tihchhiat leh pawikhawihna thleng eng emaw zat sawi a awm a ni a ni.
Ngennaah hian a tuartu party worker-te venhimna tur leh tharum thawhna thleng nia sawite mumal taka chhui chian a nih theih nan kaihhruaina a dil a ni.
Kolkata, Howrah leh district khawpui eng emaw zatah buaina leh thil tihchhiatna thleng sawi a awm a, BJP leh TMC hian he thil thlengah hian a titu zawkah an inpuh tawn reng bawk a ni.