Spain in Nations League final an lut

June 15, Ningani zan khan UEFA Nations League semi-final hnuhnung zawk khelh a ni a. De Grolsch Veste, Enschede, Netherlands-a inkhel hmuhnawm takah Spain chuan 2-1 in European champion Italy an hneh a, final an lut. Spain hian final-ah Netherlands hnehtu Croatia an hmachhawn dawn. Nations League 2023 final hi Pathianni zan dar 12:15-ah khelh a ni ang.
De Grolsch Veste mualah Spain bul an tan tha a, goal pawh an thun thuai. European champion Italy pawhin hma takah goal an thun ve bawk. Minute 11 chhung leka goal hnih a luh hman laiin Spain chakna goal hi minute 88-na daih lut a ni ve thung. Inkhel hmuhnawm leh inbuk tawk takah Spain hi Joselu goal thun hmanga chakin final an lut.
Kum 2012 hnu lama rophy lak la nei lo Spain hian ngam takin European champion Italy an nawr a, vanneihna an hlawhchhuak nghal thuai. Inkhel tan atanga minute thumnaa lekah Italy captain leh an defender chhuanvawr Leonardo Bonucci a chesual a, ho takin ball a hloh. Bonucci ball hloh hi Spain forward Yeremy Pino chuan chang fuhin si nghak Donaruma rin hman hlek lova rangin a pek goal a, hmahruaina goal a thun. Hma taka goal an thun vangin Spain hian inrintawkna sang zawk nen Italy an hmachhawn zui theih phah.
An chetsual vang liau liauin goal chhuah thuai mah se Italy an insiamtha thuai a, an si phurh sut turin an nghah rei a ngai lo. Fuh taka ball an inpek kual hnuin box chhungah ball an vawrh lut. Ball an vawrh luh hian Robin le Normand kut a fuh a, penalty an hlawhchhuak. He penaty hi Ciro Immobile chuan minute 11-naah chiang zetin a pet goal a, an si phurh a sut. Ciro Immobile hian kum hnih chuang zet hnuah ram tan goal a thun ve leh ta a, a chet that chhunzawm theih a beiseiawm.
Real Sociedad defender Robin le Normand hian Spain tan a vawi khat nan a khel a, ram tan a khelh hmasakna berah penalty a chawi a, hnuhmna duhawm lo tak a hnutchhiah. Penalty chawi bawk mah se Joselu goal thun vangin an chak hlauh thung a, a chunga phurrit inchhek khawl tur lak lo a nih hlauh thung.
An si phurh sutna goal an thun hnuin Italy an kheltha chhunzawm a, goal an thun belh leh thuai. He an goal thun hi VAR rawn a nih ngial hnuin offside-ah ngaih a ni a, hnawl a ni. Offside a nih hlauh vangin vanneih thlak takin Spain an him a, he offside hi Italy tan a vanduaithlak viau thung. An him hlauh hnuin Spain in goal thun theihna hun tha an nei zui a, Alvaro Morata pet hlauhawm tak chu Italy si ngha Donaruma chuan tha zetin a dang a, Italy a chhanhim. Morata hian chawlhlawk hmain goal thun theihna hun tha neih belh leh bawk mah se a hun tha a chhawr tangkai thei chuang lo va, 1-1 a inhneh-tawk chungin chawlhlawk an hmang.
Chawlhlawk hnu lamah team hnihte goal thun tumin an innawr tawn nasa viau a, inkhel hmuhnawm an lantir chhunzawm. Second half-ah hian Spain in bul an tan tha nawn leh a, goal thun theihna hun tha zet mai nei mah se uiawm takin an hun tha an hloh nawn leh. Champions League-a Manchester City champion puitu Pedri pawhin goal thun theihna hun tha tak nei bawk mah se goal ruakah pet lut lovin goal chungah a pet chhuak tlat thung. Derthawng taka an awm reng hnuin Italy in duh zetin an khingpuite an nawr tlang a, goal thun theihna hun tha zet nei mah se an chhawr tangkai thei bik lo. Goal thun theihna hun tha an neih an inhlah chhawk zak zak hnuin hun tawp dawn tepah goal a lut ta nge nge. Bench atanga lut Joselu chuan vanneithlak ang reng takin minute 88-naah hma an hruai nawn lehna goal a thun a. He goal hmang hian Spain hian hnehna hlu tak an chang a, final an lut lut ta a ni.
UEFA Nations League 2022-23 hi Pathianni zan hian a hmawr bawk fel a ni dawn. Zan dar 6:30-ah inelna thlengtu Netherlands leh Italy ten pathumna an inchuh ang a. Zanlai dar 12:15-ah Spain leh Croatia ten final an khel ve thung ang.
Final-a inhmachhawn tur Spain leh Croatia te hi vawi kua an lo inhmachhawn tawh a. Spain hi an inkarah record nei tha zawk an ni a, Croatia lakah vawi nga an chak tawh am vawi thum tlawm zawkah an tang tawh a. Vawikhat an inhnehtawk tawh.