Special School-in kum 10 tlin lawm

Ephatha Special School for the Deaf & Hard of Hearing chuan an school kum 10 tlin chu anmahni awmna College Veng-ah Thawhtanni khan an lawm a, Aizawl South-I bialtu MLA, minister C Lalsawivunga’n a hmanpui.
Ephatha Special School for the Deaf and Hard of Hearing hi Ephatha Society of Mizoram for the Deaf and Hard of Hearing (ESOMDHH) enkawl a ni a, tunah zirlai 32 awmin Indian Sign Language hmangin zirtirna pek thin an ni. India rama a hmasa ber atan Mizoram State Commission for Protection of Child Rights nen thawkdunin POCSO Act chu Indian Sign Language hmangin video an siam a ni.
Mizoram State Council for Child Welfare buatsaih National Painting Competition (state level) ah pawh kum 2022, 2024 leh 2025-ah khan junior leh senior category-ah pakhatna an lo ni tawh a. Bengngawng tawngtheiloten Pathian thu an ngaihthlak ve theihna turin Sunday Service for the Deaf chu ESOMDHH hmalaknain kum 2024 atang khan Ramhlun East Presbyterian biak inah hman thin a ni bawk.
An kum 10 tlin lawmnaah hian Ephatha Special School naupangten special item an entir a ni.