State Day-ah ram pum huap tawngtai runpui nei turin ngen

State Day-ah ram pum huap
tawngtai runpui nei turin ngen
February 20-a Mizoram State Day-ah ram pum huapin Pathian ram a thlen theihna atan tawngtai runpui nei turin kohhran tin ngen an ni.
State Day of Prayer Committee chuan tawngtai runpui neih tum hi an sawizau a. Kum hmasaah sual thupa chawin State Day-ah tawngtai runpui hi huaihawt a lo ni tawh a. Tawnhriat an la loh avangin duh angin state pum a huap tawk lo deuh a, kuminah chuan district tin leh khaw tinah kohhran hrang hrang intelkhawmin ‘organising committee’ dinin hma lo la turin an ngen tih he Committee working vice chairman, minister F Rodingliana chuan a sawi.
Kum hmasaah sual thupha chawina – ‘Ninevi Challenge’ tih hming chawiin tawngtai runpui hi buatsaih a ni a. Kuminah chuan Mizoramah Pathian a lal ber a, a duh anga ram kaihhruai a nih theihnan “I ram lo thleng rawh se” (Matthaia 6:10) tiin, ‘Fiji Challenge’ tih hmingpu in neih a ni dawn tih a sawi. “Kan ramah Pathian ram a thlen ngei theihnan kohhran pawl hrang hrangten thukhat vuaa Lalpa hmaa tawngtaiho hi huaihawt a ni a, Zoram mipui thinlung hmunkhat pua tawngtai ho turin kan sawm a ni,” a ti.
Tawngtai runpui hi sawrkar hmalakna ni chiah lo mah se, ZPM a sawrkar hnu ah chief minister Pu Lalduhoma chu mi thahnemngaiten hetiang hun buatsaih turin an ngen fo a, chumi atanga he thil hi lo chhuak ta a ni tih F Rodingliana hian a sawi a. State Day of Prayer Committee-ah hian chief minister chu chairman niin, vice chairman-ah Rev Dr K Thanzauva a ni a, kohhran hrang hrang atangin mawhphurtu an inruat tih a sawi. Chutihrualoin, kohhran lian ber Mizoram Prebyterian Kohhran chu nu leh pa chan chang turin an ngen a, an ni pawh an inhawng hle tih a sawi a ni.
He thil huaihawtnaa senso ngaiah sawrkar atangin sum an beisei loa, rinna in an kal anga, kohhran, pawl leh mimal inphalten an thawhkhawmin an kal dawn tih Committee hruaitute chuan an sawi. Kum kalta khan stage siamna leh sound system hman man chu a tihsaktuten a thlawnin an tihsak a, tui pawh a thlawna tumsaktu an awm a; chuti chung chuan cheng nuai 6 vel an seng niin zawhna an chhang.
Kuminah hian State Day of Prayer pualin veng/ khaw tinah ‘zan chanve’ tawngtai pawh huaihawt turin kohhran ho an ngen tih an sawi a. Member 1500 aia tlem lo zaipawl pui neih tumin hma an la dawn tih an sawi a. Hemi huaihawt tur hian Central KTP an ngen a, an ni hian an ngaihtuah dawn mek niin an sawi.
An thil tih tum hi Mizoram Kohhran Hruaitute Committee leh Church Council of Mizoram an sawipui tawh a, a ni-ah hian political party hrang hrang aiawhte tan pawh hun siam tum a ni a, tawngtaipui an ngaihna lai theuh thawh tura sawm an tum tih Committee hian an sawi.
“Nikumah thusawi a tam deuh a, kuminah chuan tawngtai lam kan uar tawh ang. Zoram ringtute hian kan inngahna hi central sawrkar ni loin, Pathian ni hmasa se kan duh. Central-a project thehluh dawnah pawh kan sawrkar hotulute hian tawngtaina nen thehluh se kan duh a, chu chu he tawngtai runpui thiltum zinga pakhat pawh a ni,” State Day of Prayer Committee working vice chairman chuan a ti.