‘Supplementary Demand a tam’

Pawisa kum kal lai 2025-26 hi March thlaah a tawp dawn a, he kum kal laia sum hman, 2025-26 budget-a tel lo chu cheng vaibelchhe 3710.38 a ni. Economist-te leh budget ngaihvente’n hei hi a tam an ti.
Sorkar kalphungah financial year thara sorkar sum hmuh tura beisei leh sum hman tur an pass thin a, chumi ngaihtuahna chu budget session hi a ni. 2025-26 budget kha nikumah an pass a, chuta lang lo, sum hman ni si chu budget thar an pharhin finance minister-in a pharh tel thin. Chu chu supplementary demand for grants an ti a, March ni 3 khan Budget Session neih mekah an pawm a ni.
2025-26 chhunga budget-a lang lo, mahse sum hman ni si, House-in an pawm hi cheng vaibelchhe 3710.38 a ni a, Dr James LT Thanga, department of economics, Mizoram University chuan tam a tih thu a sawi a, a him lo a ti.
“Supplemenary demand-ah cheng heti zat hi a tam khawp mai. Cheng vaibelchhe 1000 bawr, 1500 vel te chu normal-ah pawh a ngaih theih ang a, keini state tan chuan cheng vaibelchhe 3000 chuang hi chu a sang khawp mai,” a ti.
“Budget an han pharh a, sum hman dan tur hi demand for grants-ah an ziak vek a. Mahse a tak ramah chutiang diak diak chuan an hmang thei ta lo a, chumi approval dilna chu a ni ta a. Pumpelh theih chu a ni lo a, mahse kan hmanna a dik em tih leh kan hmang tam em tih hi a pawimawh a. Demand for grants-a lang lo cheng vaibelchhe 3000 chuang kan hmang hi keini tan chuan a tam a, kan budget atanga 30% aia tam daih a ni. Thil serious a ni,” a ti bawk.
“Budget siam laiin kan serious lo tihna a ni a. Mipui hmaa kan budget pharh hi a takah kan zawm lo, a siam rem leh theih tho tih rilru puin budget kan siam tihna a ni ang, discretionary fund kha duhna lamah pek theihna kawng a awm kan ti tihna a ni a,” tiin a pawina lai a sawi.
Leiba titamtu tia sawi tur khawp chu a ni lo ang tiin a sawi a, mahse leiba titamtu a nih theih dan chu a awm a ti thung.