Swadesh Darshan 2.0

Sawrkar laipui Ministry of Tourism-in nikum April thlaa Swadesh Darshan 2.0 Scheme a puan tak hnuaia Champhai district-in cheng nuai 9000 hmanga hmalakna tur a hmuh chungchang sawihona chu tun hnai khan Champhai bawrhsap hova neih a ni a. He scheme hmalaakna tur hmunte hi Tlangsam, Zotlang, Keilungliah, Vangchhia, Farkawn leh Dungtlang te a ni.
Swadesh Darshan hi sawrkar laipuiin tourism hmanga ram economy dawmkanna tura a duan a ni a. Kum 2015 khan hman tan niin Swadesh Darshan 1.0 hnuaiah khan project pahnih —(1) Integrated Development of Eco-Tourism North East Circuit (Thenzawl &South Zote, Serchhip District and Reiek) leh; (2) Development of Eco-Adventure Circuit (Aizawl – Rawpuichhip – Khawhpawp – Lengpui – Durtlang- Chaltlang – Sakawrhmuituai Tlang – Muthi – Berawtlang – Tuirial Airfield – Hmuifang) te chu Mizoram pawhin 2017 khan a dawng ve a. Project pakhat zawk Eco-Tourism hnuai ami hi chu zawhfel thawkhat a ni ve a, chung zingah chuan Thenzawla Golf Course te pawh hi a tel.
Project pakhat zawk Eco-Adventure hnuai ami, cheng nuai 9907 hu hi chu thla 30 (kum 2.5) chhunga zawhfel tur tih a nih laiin kum 5 liam tawh hnuah pawh hian a nihna tur anga zawhfel pakhatmah a la awm lo va. Sakawrhmuituai tlanga Skywalk phei chu Assembly Session lai pawhin House-ah sawi chhuah a ni thin. Project thawktute hian thubuai an neih avangin project-te hi tun thlengin thawh zawm theih a la ni lo lehnghal.
Hetianga tarlan deuh duah a tul chhan chu, tuna Swadesh Darshan 2.0 hnuaia project-te pawh hi awmze nei lova a zuzi ve mai loh nan a bul tan that a pawimawh dawn a, contractor-te leh nodal department-in an thawh dan hi mipui (NGO/VC) te pawhin a hlawhtlin ngei theih nana vilpui (monitoring) a pawimawh hlein a rinawm. Mi ramin tourism hi An engine of economic growth an ti a, hei hi kan ram hruaitute pawh hian an hria, potential kan neih thatzia pawh hahipin sawi tur an hria. Tuna project tha tak tak kan dawnte hi tihhlawhtlin a, a taka kalpui theih chu ni se, hna tau a tet ang a, a ram leilung fate eizawnna tam tak siamna a ni nghal bawk dawn tih pawh an hre em em; mahse, chu chuan ngaihpawimawh a hlawh zo tawk lo thin niin a lang.
Tuna state sum pawhhêk ngai lova sawrkar laipui sum kan rin theih lai hi remchangah la-in, thahnemngaihna thinlung kan put tlan hi a pawimawh dawn hle. Tuna matching share (10:90) hi nakin lawkah chuan a sâng chho dawrh tawh dawn, an tih kha.