Swift ‘Lover’ US-ah 2M an hralh

2024 kum bul kan tan chauh a, kar nga vel awrh a la kal hman tihah Taylor Swift tan chanchin lawmawm tak tak a tam leh hman tawh khawp mai. Nimin lawkah Grammt Awards pahnih dawngin, album of the year phei chu a vawi li dawnna niin, Grammy history-a he category-a award dawng ngun ber record a siam. Billboard annual Power 100 list-ah No.1 a ni a, a album pahnih- 1989 (Taylor’s Version) leh ‘Lover’ te chu US-ah maktaduai 2 an hralh tling leh tawh bawk.
1989 (Taylor’s Version) hi 2023-a tlangzarh kha niin, kumin January ni 11 khan US-ah traditional album sales (album tak tak hralhna, streaming atanga album hralhna tlukpui tih vel tel lo)-ah maktaduai 2 a kai a, 2019-a a album tlangzarh ‘Lover’ pawh US-ah maktaduai 2 an hralh tling ve leh ta a ni. Tihian Swift hian US-ah album maktaduai 2 chuang hralh tlin theih 10 a nei tling ta chiah a ni.
Swift album, US-ah hralh tam ber chu ‘Fearless’ kha niin, US-ah ringawt maktaduai 7.286 a hralh thei.