Thawhtanni atangin bawlhhlawh paih lirtheite ding vek dawn

Bawlhhlawh paih motor hman man rualkhai leh mumal siam phutin bawlhhlawh paih motor-te chu September ni 23, 2024 Thawhtanni atangin tiam chin awm lovin an ding vek dawn.Hemi chungchangah hian pawl pathum, ‘Aizawl Garbage Vehicle Owners’ Association (AGVOA)’, ‘PP Mode Bawlhhlawh Paih Welfare’ leh, ‘Sanitation Driver & Handyman Association(SD&HA)’ te chuan nimin khan press conference neiin thuthar thehdarhtute hmaah thil awmzia an sawifiah a ni.
Pawl pathumte hian, bawlhhlawh paih motor hman man rualkhai leh mumal zawk, veng tin hlat dan mil (per kilometer behchhan nei) zela siam tha turin AMC hotute hnenah vawi engemawzat an lo thlen tawh tih an sawi a. AGVOA chuan October ni 25, 2019 atang khan bawlhhlawh paih motor hman man siam tha tura ngenna lehkhain vawi 8 lai thuneitute hnenah an lo thlen tawh tih an sawi a. PPP Mode Bawlhhlawh Paih Welfare te pawhin vawi engemawzat an lo thlen tawh bawk tih an sawi bawk.
Pawl pathum hian September ni 6, 2024 khan chief minister office-ah leh UD&PA minister office-ah, Aizawl khawpui chhung bawlhhlawh paih motor neituten motor hman mana harsatna kan tawh avanga flag dum kan tar tur chungchang’ tih lehkha an theh lut a. Sept ni 9 atangin flag dum an tar tan a, thuneitute atanga an beisei ang an hmuh tak loh avangin ‘tiam chin awm lova din vek tur’ tih chu an rel ta a ni.
Pawl pathumte hian, bawlhhlawh paih motor hman man mumal loh avang hian lungrual taka hma lak a har a, motor enkawlna senso lo sang zel bawk nen, rate mumal lo tuartute tan chuan a beidawnthlak a, bawlhhlawh paih motor zawng zawng ding a, rate siam tha tura nawrh hial a ngai hi a lungchhiatthlak kan ti hle a ni, an ti a. Bawlhhlawh paihtute chungah rorelna dik, rualkhai leh mumal tak a awm theih nan dawhtheihna nena min thlawp turin Aizawl mipuite kan ngen a ni, an ti bawk.