Thisen pekna lama khawl mamawh tak ACH-ah hlan

Thisen pekna lama khawl
mamawh tak ACH-ah hlan
Thisen pek lama khawl pawimawh Apheresis machine chu Ashraya Hastha Trust, Bengaluru chuan Civil Hospital Aizawl hnenah a pe a, Thawhlehni khan Health minister Lalrinpuii kutah an hlan.
Health minister chuan theihtawp chhuahin blood donation drive kalpui thin mah se, Civil Hospital-ah hian thisen indaih tak tak a har a. Blood bank-a thisen hi inrenchem taka hman a ngai fo tih a sawi.
An lo tih thin dan (traditional method) ah chuan thisen petu (donor) thisena component thenkhat – plasma, white blood cell (platelets) adt. chauh mamawh heng natna – thin tha lo, leukemia, dengue, cancer leh a dangte tan pawh donor hian a thisen hi a ngai ngaia a pek tho a ngai thin a. Apheresis khawl hian thisen component mamawh chauh a lakchhuah zawhah, a lakchhuah hnu thisen bang zawng kha donor hnenah a pe let leh dawn tih a sawi a ni.
Hei bakah hian thisen mamawh damlo hian mi dang dang thisen a dawn a ngai tawh dawn lo a, natna inkaihchhawn palh thei lakah pawh a him zawk tawh dawn tih a sawi bawk. Mizoramin Apheresis khawl a mamawh zia hria a, Ashraya Hasta Trust-in an dilna an lo pawmsak chu a lawm hle tih a sawi a. Hmalam hunah pawh tanpui chhunzawm zel turin a ngen a ni.
Ashraya Hasta Trust director NK Sharma chuan khawl mamawh deuh an pek theihnaa kawng sialtu, Bengaluru-a kum tam tak lo awm tawh Health minister hnenah lawmthu an sawi let tih a sawi a. An Trust chu non-profit organization, India ram state 26-ah kum upa zawk, mirethei leh chanhai tan hriselna kawngah leh kawng hrang hrangin chhawmdawlna hna an thawk mek tih a sawi. Apheresis khawl hi cheng nuai 60 man vel a ni.