Thla nga chhungin ganja man hnem tawh

Mizoramah ganja man tur a awm deuh reng a,
kuminah pawh May thla thleng khan Mizoram Excise & Narcotics (MEN) department-in ganja hi kg 110.344 an man tawh.
MEN department hian ganja kg 110.344 bakah ganja vangin May thla thleng khan mi 35 an man tawh a, ganja vangin case 25 an ziaklut tawh.
Kumina thla nga chhunga an man hi a tlem lo a, 2020 kum tluana an man zat a pha thuak. 2020-ah khan ganja hi a hluar thar leh tia sawi a ni tawh a, khami kumah khan kg 125.244 an man.
Kum 10 vel liam ta atang khan ganja zu thin an pung nia ngaih a ni a, MEN department chhinchhiahna enin, 2020 hnuah ganja hi an man nasa tih a lang. 2020-ah kg 125.244 an man a, 2021-ah kg 321.734 lawih an man. 2022-ah kg 305.981 an man a, kuminah thla nga chhungin an man leh nual tawh bawk.
MEN department hotute chuan ganja hi tleirawl, kum lama la naupang tak takin an intihhmuh tih an sawi a, khawvel mi lar an ngaihsante’n an lo zukin, chu chu an entawn thin an ti.
Case siamsak theih loh, kum tling lo man tur an awm fo tih an sawi a, ganja vang hian kum tling lo an man fo tih an sawi.
Ganja a hluar a, thangthar zingah ganja han zu ve mai an awm thin tih hi hetiang lam veite thlir dan a ni a, khawthlang lama khawlai tawnga an sawi dan, ‘weed’ tih chu Aizawlah pawh tleirawlte’n an sawi dan a ni.