Thlai thar leina nuai 2000 dah tawh – ZPM V/P

Thlai thar leina nuai 2000 dah tawh
– ZPM V/P
ZPM sawrkarin thlai thar leina atan a thawhkhatnaah cheng nuai 2000 chu Mizoram Agriculture Marketing Board kutah a dah fel tawh niin ZPM vice president C Lalnunnema chuan a sawi.
VC inthlan turah Thorang bial chhunga campaign ZPM vice president hian, ZPM sawrkar chu kuthnathawktute hmangaihtu a nih angin kuthna thawka eizawngten hlawk zawka thlai thar thlan bik – hmunphiah, sawhthing, aieng leh hmarcha an hralh theihna turin tih takzetin a buaipui mek tih a sawi a. Thorang bial chhungah Secondary Collection Centre pathum awmin sawrkarin thlai thar leina (market support price) tur pawh budget-ah a dah a, tunah hian a thawhkhatna atan cheng nuai 2000 chu Mizoram Agriculture Marketing Board kutah a dah fel tawh tih a sawi.
“A tul ang zelin support price hi dah a ni dawn a, hmun hrang hrangah sawrkar chuan empanelled buyer-te hmangin thlai thar lei hi a buaipui mek a ni,” a ti.
Mizorama Assembly constituency zawng zawngah Thorang bial chu kawngpui chhiatna ber a nih a rinawm tih C Lalnunnema hian a sawi a. PWD minister Pu Vanlalhlanna hmalakna azarah tunah hian Thorang bial chhungah kawngpui pawimawh siamthat chhoh mek niin, ZPM sawrkar hnuah Phairuang to Bunghmun Road (Thenhlum thleng) PMGSY III hnuaiah open tender hmangin contractor-in a siam mek a. Buarpui to Bunghmun kawng pawh a chhe zual lai siamthat mek a ni tih a sawi. “Sawrkar hmasate muthluksan Thorang bialah hian kalphung thar sawrkar zarah hmasawnna thar kan hmu chho a ni,” a ti.