Thutak Nunpuitu Team an kal zel

Thutak Nunpuitu Team-in tan hmun sawhnghetin inpumkhat tha takin an khel chhunzawm a, Inrinni zan Ather Pro Volleyball League-ah set thum set khatin Durtlang North an hneh.
LPS Arena, Falkland-ah Vanlaltanchhana (Valbuanga) chuan a hma aia hlawkin a khel a, Zosangzuala (Lalmama) leh Laldinchhunga nen TNT fuihphurin 25-20, 24-26, 25-17, 25-17 hnehna an sualchhuak.
An inlan hmasak vawihnihah champion lai TNT-in champion thei tura rin hlawh an khelhpui nghal a, Hunthar lakah set la loa an tlawm hnuah Tuichangral nen set nga inkhelin an chak hram. Durtlang North hmaah Valbuanga’n point 20 hmuin tum riat a tisual a, Lalmama’n point hnih paihin 12 a thawkchhuak ve bawk.
Khelh thumah league point nga hmuin Muanna Veng team-in an elpuite aiin an khel tam a, table-ah pahnihna luah lailawkin, an thlen chinah Valbuanga’n point 55 hmu tawhin 28 a hloh a; Lalmama’n 41 hlawhchhuakin point vawi ruk chiah a la paih a ni.
Kum 2022 champion Durtlang North-in set thum set khata kaithar Hlimen an hneh hnuah fiahna tling inkhel TNT lakah an hmachhawn a; Shashank Kandpal chuan point 11 paih chungin tum 27 vaw tla mah se anni aia thawhhona nei tha zawk TNT hmaah a tawk zo lo.
Uttarakhand atanga an lakluh Shashank hian mimal chawimawina Kuriz Player of the Match lawmman a dawng zawn a, amah thlawptu Johan Vanneihsanga’n tum 17 hlap tlain point 13 a hloh a, Thangminlal Guite chuan vawi 11 hlap tlain vawisarih a tisual bawk.
Set khatnaah 11-11 a nih laiin Lalmama’n vaw tlain TNT-in an kalsan a, hawi kir tawh loin 23-20 a nih hnuah Lalmama’n hlap tla lehin Valbuanga vuak an dang thei lo zui leh.
Set hnihnaah Durtlang North-in an tih theih an lantir ve thung a, 10-7-a hniam zawk an nih hnuah an insimtha.
Johana’n a hlap tlak hnuah net chung atangin TNT vuak vawithum an dang tla zawn a, 11-10-in an lehpel. Vaw na tak Shashank chuan team tanpuiin 16-11-a sang zawk a nihpui hnuah point khat hmuh belha set la thei turin 24-22-in hma an hruai.
Inelna sangah TNT-in tibuaiin an tlang mai thei lo a, 24-24 ni zui lehin Durtlang North an derthawng leh hman. Thanga’n hlap tlain boruak rit a vaikiang a, Shashank chuan na takin a hlap zui ve leh a, set hnihna an la.
An inhnehtawk lai takin TNT-in an nawr tawm a, a hma aia zangkhai leh hriam zawkin inkhel an thunun thei. Shashank leh lehlam player-te vuak an dansak tam a, set thumna leh linaah Durtlang North talbuaiin an bei let zo tawh lo.
Set thumna ang bawkin set linaah TNT an fal hle a, 21-11-a sang zawk an nih laiin kum kalta anga taksa lama inpeih tawk lo Valbuanga an lachhuak. Hemi hnu hian point ruk hloh mah se Sadrak Fanai chuan nam tlain phu takin hnehna an thawkchhuak a ni.
Khairual takin TNT player-te khelin hma a sawn a, Dinchhunga’n point 11 hmuin tum thum a tisual a, K. Zodingliana’n point khat hlohin point kua a thawh bakah, Sadraka’n paih nei loin point ruk a hmu bawk a; May ni 9 zanah Chhinga Veng Spikers nen an inkhel leh ang.
Durtlang North-in khelh hnihah point thum kawlin a sang pali zingah tel mah se khelh thum an la neihah title cho phak turin awmze neia hmasawnna an mamawh hle a, May ni 11-ah fiahna tling inkhel hmachhawn lehin Tuichangral nen an intawng dawn a ni.