Tlangah ruahpui a sur e!

Ruah tui tamna Mizoramah ruah a sur tluk tluk a, ruah tamna ramah pawh ruah tui tam kum a ni mek.
State Meteorological Centre chhinchhiah danin, May thlaah khan ruah hi mm 519 a sur a, kum dang May-ah hetiang zat hi a la sur ngai lo. June-ah a sur chhunzawm zel bawk.
State Meteorological Centre-a an chhinchhiah danin, kumin June thlaah ni 26 thleng khan ruah hi mm 335.5 a sur tawh a, ni 26 chhunga June thlaa surah hei hi a tam. 2021 June thla tluanin ruah mm 336.1 a sur a, 2022 June thlaah mm 355.3, nikum June thlaah mm 381.7 a sur.
June-ah ni li a la awm a, khawchin hrilhlawknaah ruah hi tun karah la sur turin an chhut bawk.
Tun hnai kum 10 (2015-24) chhunga ruah tam lam chhutin, kumin kum chawhma lamah ruah a tam hle; kuminah January ni 1 atanga June ni 26 thlengin ruah mm 992.3 a sur a, tun hnai kum 10 chhungin January atanga June thlengin chawhrualin ruah hi mm 833.41 a sur ziah ang a ni a, chu aia mm 158.89-a tam kuminah June ni 26 thleng khan a sur tawh. Chawhruala kum chanve chawhma lama ruah tla zat ai hian kumin kum chawhma lama ruah tla hi 19.6%-in a tam tawh.
2017-ah khan January atanga June thlengin ruah hi mm 1219.6 a tla a, hemi tih loh kum dang chu kumin January atanga June ni 26 thlenga ruah tla zatin a khum vek.
2023-ah khan June thlengin mm 660.6 a sur a, 2022-ah mm 850.5, 2021-ah mm 650.3 a sur. Heng hi kumina ruah tla zatin a khum hneh tawh hle.
2017 kha khawchin chungchangah kum mak tak a ni tiin a sawi theih ang; Aizawl vawh ber tum leh Aizawl lum ber tumte hi 2017-a mi a ni a, ruah pawh hemi kum hian a tam.