Tourism leh Mizoram
Tourism chungchang hian sawi a hlawh ta hle mai a, sawi tur a awm chuan hmasawnna a awm tihna a ni mai awm e.
Tun tumah pawh, chief minister leh tourism minister, Delhi-a zin chuan tourism kaihhnawih mi pawimawhte an hmu tih thu hriattur a awm a. Niti Aayog phei chuan, Mizoram tourism policy changtlung zawk duan dan tur te, Mizoram puala Institute of Hotel Management-Ashok (IHM-A) hnuaia a thlawna training neih theih dante leh investor koh luh chungchangte chief minister leh tourism minister hi an lo sawipui nghe nghe a ni.
Sawrkar laipui hian a ram pum huap angin tourism chawikan hi a thupui ber pakhat a ni a. Tourism industry hi revenue hmuhna hnar tha tak a ni tih Central sawrkar hian a hria a. Hei vang hian state tinte pawh tourism promote-na lam hawia hma la chak turin a tur a, khualzinte hip thei tur phuahchawp festival te pawh siam turin a ti a, tourism promote-na lam project reng reng, awmze nei tur a nih phawt chuan senso lamah sawrkar laipui hi a buai lem lo niawm tak a ni.
Mizoram state hian tourism hmanga sum hailuhna kawngah theihna (potential) tha tak a nei tih hi sawrkar laipui hian a hriatna a rei tawh; mahse, keimahni lam zawk hian kan tuipui teh chiam lo. Tourism kan tuipui lo a niang tih rin theihna pakhat chu, State Institute of Hotel Management (SIHM) din tura hmalakna a puitling zo lo tlat hi a ni. Mizorama hotel management zirna in din tur hian kum 2006 atangin hma lak tan a ni a, building te pawh a ding tawh a, mahse kalpui (functional) tura a pawimawh lai tak post creation a awm thei tlat lo.
SIHM din tur chungchangah hian Public Accounts Committee (PAC) pawhin thil awmzia a chhui zui a, a puitling zo dawn lova ngaiin, SIHM building, Bung Bangla ami chu thil danga hman tangkai ni zawk se tiin rawtna a siam a. He rawtna hi Mizoram Legislative Assembly Session August ni 27, 2025 khan PAC Sixth Report-ah tarlan a nih kha.
Tun tuma chief minister-te nen an inkawm tum hian, Niti Aayog lam hian Institute of Hotel Management-Ashok (IHM-A) hnuaia a thlawna training neih theih dan tur min ngaihtuahpui lai hian, Mizoramin SIHM kan puitlin zo lo tihte hi an lo hre khiau maithei.
Eng pawh ni se, tourism lama hmasawnna nei tura hmalakna thar tam tak hmuh tur leh hriattur a awm chho zel hian, nakin lawkah Mizoram hi India rama tourism destination langsar ber pawlah min la hlangkai ngei turin i beisei phawt mai teh ang.