Tuirini HP chhunzawm tum vangin ZPM sawrkar chungah kan lawm

Tuirini HP chhunzawm tum vangin
ZPM sawrkar chungah kan lawm
Congress sawrkarin bul a lo tan tawh, MNF sawrkarin a chhunzawm duh loh Tuirini Hydel Project chhunzawm an tum avangin an chungah an lawm hle tih MPCC hruaitu Joseph Lalhimpuia chuan a sawi.
Thawhtannia Congress Bhavan-a inkhawmah MPCC Political Affairs Committee member Joseph Lalhimpuia chuan, power security neih chu Congress party ngaihpawimawh niin an hotu kaltate khan theihtawpin hma an la thin a. Power-a intodelh tura hma an lakna avang hian State Assembly-ah pawh lawmthu sawina resolution pawm a lo ni tawh a, tuna chief minister ni lai Pu Lalduhoma phei chu tha ti tu a ni nghe nghe tih a sawi.
Tuirini Hydel Project chu Congress sawrkar bultan niin, khatihlai chief minister Pu Lal Thanhawla chuan BRICS hnuaia New Development tanpuina hmangin power megawatt 24 pechhuak thei turin thawh a ni dawn tih 2018 Independence Day lawmnaah a sawi tih a sawichhawng a. MNF a sawrkar zui hnu ah, 2019 Independence Day lawmnaah chief minister Pu Zoramthanga chuan, Tuirini HP hi cheng vaibelchhe 465 senna turin sawrkar laipuiin a pawmpui thu leh reilote ah hna tan tum a nih thu a puang ve leh tih a sawi a ni.
Hetihlai hian 2020 June 4 khan CM Zoramthanga hian ‘technically leh economically’ vangin he project hi tihtawp a nih thu a sawi ta daih a, sum an rawn pek sa pawh an pe let leh tih sawiin, “Congress hmalakna a nih avanga hna tan nghal mai theih an duh tlat lo kha a pawi a, chhunzawm se chuan a tam zawk zo tawhin kan state-in Mw 24 kan ta liau liau power kan nei tawh tur a ni. MNF sawrkar khan kalpui hleithei loa sum dawnsa pawh pekir leh duh hiala a awm hnuah ZPM sawrkarin vbch. 767 senga Tuirini HP a chhunzawm leh tur hi Congress party chuan lawmawm a ti hle,” a ti.
MNF a sawrkar laiin vote beiseina vangin inthlan hnaih apiangin zirna an suasam thin tih MPCC hruaitu hian a sawi a. 2008 inthlan hma lawkin MNF sawrkarin school 337 a upgrade a, zirtirtu 277 la in thawktu dang 132 lak turin a ruahman a. Sum engmah ruahman sak a nei lo tih a sawi.
Congress a sawrkar a, an han zirchianin, kum khatah cheng vbch. 70 aia tam pek a lo ngai a, dan mumal tlawhchhan pakhatmah nei lo mah se, CM Pu Lal Thanhawla’n hunrei tak harsa taka lo thawk tawh an ni a, theihtawp an chhuah anga, an zawh ngang loh leh thudang nise, tiin, an kaltlang pui a, vawiin thlengin chhawm chho a ni ta tih a sawi.
MNF sawrkar hian 2023 September 27 khan school 340 a upgrade leh a. ZPM sawrkarin dan thar siama kum hnih chuang a khalhkual hnum an thial an thial hnuah school 52 an provincialise leh ta tih Joseph Lalhimpuia hian a sawi.
“Heta tehfung an hman ber chu zirlai neih zat atangin, tih a ni a, khawpuia cheng tam dan ngaihtuahin thingtlang school tan chuan tel ve ngaihna a awm lo tluk a ni,” a ti.