Clinical depression hi hmeichhia te chauh neih chi niawma sawi te a awm thin a, mahse, mipa te pawhin depression hi an nei ve thei khawp mai.
-- Advertisement --
Mahse, mipa depression thawh dan chu a danglam thei a, hmeichhia te nena tehkhin chuan a symptoms pawh a dang daih thei. Chutih rualin mipa ten hetiang symptoms an neih pawhin mithiam te tanpui dawn tura rawn an hreh zawk niin an sawi bawk.
National Institute of Mental Health (NIMH) research atanga a lan dan chuan mipa tam zawk chuan depression physical symptoms hi an hrethiam lo. Mahse, chu chu enkawl a nih loh chuan thil tha lo tak a thlen thei a ni.
Times Of India health section-in mipaa depression symptoms pawimawh zual ni a a sawite kan rawn tarlang ve e.
1. Thil ngaihtuah bing theih lohna. Hnaah emaw zirlaiah emaw ngaihtuahbing (concentrate) a harsa bik. A tha lam aiin a chhe lamah i ngaihtuahna a kal chak ta zawk riau em? Depression hian uluk leh chik taka thil kan ngaihtuah theihna te a tibuai thin a ni.
2. Thinrim deuh reng emaw dawhtheih lohna. Hei hi depression sign common pawl tak a ni. Hmeichhia ten an emotion chu mittui hmanga an tihlan mai laiin mipa te chuan thinrimna leh rik deuh bur zawngin an lantir thung thin. Ho te-a thinrim te an awlsam a, an dawhthei lo em em bawk.
3. Mipa ten depression an neihin ruihtheih thil lama tlan an awlsam thin. Mahse, an hriat loh chu depression leh ruihtheih thil (a bikin zu leh drugs) te hi a inchawm tawn tlat. Hahchawlhna tur an zawnna chuan rilru hahna a belhchhah zawk hlauh thin.
4. Mipat hmeichhiatna lamah an chak lo. Mipaah chuan depression hian nupa hmanna kawngah a tichak lo a, pa hleitheih lohna te pawh a thlen thin.
5. Natna benvawn leh digestion lama harsatna a siam thin. Harvard Medical School-a mithiam ten zirchianna an neih atangin depression hian natna benvawn a siam thei a, chubakah digestion lamah pawh harsatna a thlen thin.
6. Mut dan a buai. Depression hian kan mut dan a tibuai thei a, mut nasat lutuk emaw mut theih loh te emawin a thawk thei. Depression nei te chu a tlangpuiin zingkar hma takah an harh a, an muhil leh thei tawh thin lo. Thenkhat chu an zan mu te pawh an harh deuh sek a, zing thawh an harsat leh thung thin.
7. Chauh ngawih ngawihna te pawh a thlen thei. Depression nei mi thenkhat chu a chhan hriat si lohin an chau/ zawi ngawih ngawih thin. An thil tih thin pangngai te pawh tih an phur lova, thathona an nei lo thin.