NBA champion Denver Nuggets

June 13, Thawhleh zing khan NBA Final game ngana khelh a ni a. Series ah 3-1 a hmahruai tawh Denver Nuggets chuan an khingpui Miami Heat chu point 94-89 in an hneh a, NBA-ah a vawi khat nan an champion. Nuggets champion nana thawhhlawk tak Nikola Jokic chu final MVP-ah thlan a ni.
Final thawh nganaah hian 3-1 hmahruai tawh Denver Nuggets in champion chian nghal tum mah se an mualah bul an tan tha lo viau thung. An mikhual Miami Heat lakah hian quarter khatnaah point hnihin hnufual zawkah an tang phawt a. Quarter hnihnaah point ngaa hnufual zui lehin, point sarih zeta hnufual zawk chungin chawlhlawk an hmang.
An muala an inlan hnuhnung berah tlawm zawkah an tang a. Final game nganaah hnufual zawk ni chunga chawlhlawk an hman vangin Nuggets hi an mualah tlawm nawn lehin, an la champion zo lo tura ngaihna lian tak a awm hman a. Champion lawm tuma pungkhawm mipuite pawh hlauthawngin an thaw dep dep hman. Chawlhlawk hmaa an chet that loh vangin chawlhlawk hnu lamah chak let tumin tan an khawh nasa hle a, tha taka inlanin, an khingpuite an lehthal ta nge nge.
Nuggets hian quarter thumnaah point 26 an thawkchhuak a. Point thawkchhuak tam em em lo mah se an khingpuite an dang bet tha viau thung a, point rukin chungnung zawkah an tang. Quarter thumnaah point ruk ngawta an chungnun vangin an khingpuite nen an inkarah point khat chiah a tlazep tawh a, champion theih beiseina nung nei thar lehin, phur takin quarter hnuhnung berah an inlan zui leh a, an khel tha chhunzawm ta viau bawk.
Quarter hnuhnung berah hian hnehna chan ngei tumin thapui tak meuh meuh an chhuah a, an mahni tantuten an au phur tha viau bawk. Quarter hnuhnung berah hian point rukin chungnung zawkah an tang a, point ngaa an khingpuite lehthalin hnehna hlutak an chang a, NBA-ah a vawikhat nan an champion ta a ni.
Final game nganaah hian Nuggets player pawi-mawh Nikola Jokic a khel tha leh viau a, point 27 a thawhchhuah bakah ball sawhlet vawi 16 zet a dawng tling leh bawk. Kum 2021 leh 2022-ahte MVP-a thlan lo ni tawh Jokic hi NBA season hman zawh tak chiaha pawh khan a khel tha tluang leh viau a. MVP thlannaah pahnihna a ni a. MVP a nihna hum zo lo mah se a vawi khat nan Denver Nuggets chu NBA-ah a champion pui a, final MCP-ah thlan a ni ta tho a ni. Miami Heat hneha an champion tum hian Nuggets tan Michael Porter Jr chuan point 16 thawkchhuak in, ball sawhlet vawi 13 a dawng tling bawk.