Chinese spy balloon nia hriat Altantic Ocean chung zawna kahthlak atanga sesnsor chu hmuh a nih tawh thu US military te chuan an sawi.
Search crews te chan balloon kehthem an zawnna lamah sensor leh electronic bungrua hrang hrangte an chharkhawm tawh tiin US Northern Command chuan a sawi.
FBI chuan heng item-te hi an eifah ang a, US chuan balloon te chu China-in US military site te enthlak nan a hmang tiin a puh a. 4 February hnu khan US chuan China balloon nia hriat pathum a kahthlak belh tawh a ni.
“Balloon ruangam lian ber hmuh a ni tawh bawk,” tiin US sipaite chuan an sawi a. Balloon antenna array chu 30-40 ft laia sei a nih thu an sawi bawk a.
US officials te chuan high-altitude balloon chu China atanga chhuak enthlak nana hman tiin a sawi a, China thung chuan weather-monitoring airship beisei loh lama kal peng tiin a sawi ve thung.
American fighter jet te chuan high-altitude balloon dang pathum Alaska, Canada a Yukon territory leh Lake Huron chung zawnah an kahthlak belh tawh a.
Lake Huron chunga balloon an kahthlak tum hmasakah missile kahchhuah pakhatna chuan a thelh a, a pahnihna erawhin a fuh thung a. Missile pakhat man hi $400,000 a ni.
Officials te chuan heng balloon te hi original balloon te aia te zawk vek niin military pilot te tana kah fuh har tak tiin an sawi a.
White House thupuangtu John Kirby chuan heng balloon pathum te hi fimkhur thu hlaah an kap thla tiin a sawi a. Lei lama chengte tan hlauhawm an ni lo tia sawiin mahse kan ram security leh flight safety atana pawi thei a ni, tiin a sawi.
South Carolina chung zawna an kahthlak balloon chu Bus pathum tia vel lawih tiin an sawi a. Alaska chungzawna kahthlak erawh car te pangngai tia lek niin Yukon chunga an kahhtlak chu cylindrical niin a palina Michigan-a an kahthlak chu octagonal niin string nena inzam niai a ni thung.
-- Advertisement --
China-in sawi nei
China foreign ministry chuan US chuan an airspace-ah nikum khan balloon tum 10 chuang a thlawhtir tiin a sawi.
“US-in dan kalha ram dangte airspace a luh thin hi thil thar a ni lo,” tia sawiin China foreign ministry thupuangtu Wang Wenbin chuan, “Nikum ringawt khan US balloon te chu China thuneitute phalna la hauh lovin tum 10 chuang China ram chhungah an thlawk lut a ni,” a ti.
“US-in a tihmakmawh chu mahni inthianfai phawt sela, inenlet se a, China pawngpaw dem leh puh ngawt hi bansan tawh se,” a ti bawk a. “US high-altitude balloon-in dan kalha China airspace a luh in hriatfiah zual duh chuan US lam zawt mai rawh u,” tiin a sawi bawk.
China state media te chuan kar kalta tawp lam khan eng nge tih hriat loh chu an ram khawchhak tuipui kam lamah a thlawk hmuh a nih thu leh China military te chuan kahthlak tuma hma an lak thu a sawi a.
Hetih lai hian White House chuan Beijing-in China ram chhunga enthlak nan balloon a hmang tia a puhna chu hnawlin US National Security Council thupuangtu Adrienne Warson chuan ‘dawt’ tiin a sawi.